Mustér/Sedrun - Giugaders internaziunals da golf-ballape han binglà la balla

«Footgolf», u golf-ballape, è, sco il num tradescha, in sport che cumbinescha elements da ballape e da golf. En principi dattan ils giugaders golf cun ina balla da ballape e quest sin ina plazza da golf. Uschia datti er ils medems obstachels e la finamira è la medema: Metter la balla cun uschè paucs «kicks» sco pussaivel en la rusna. El turnier da la fin d'emna vargada han ils giugaders dà ina partida individuala ed ina el dubel, per silsuenter cuntanscher il final. Il Svizzer Vincent Huber maina en il mument la tabella da rangaziun. Quest davant il Franzos Geoffroy Domenech. Il turnier sin la plazza da Golf a Sedrun è stà la 7avla da 13 etappas da la «Swiss FootGolf Tour».

In sport cun origins a Genevra

Julien Babel, il president da l'Associaziun «Suisse Footgolf» è in dals piuniers da quest sport. Enturn l'onn 2000 han el ed in pèr amis entschet a dar ballape cun visar plantas sco schibas en in parc a Carouge a Genevra. Or da quest divertiment han els silsuenter creà il sport ibrid. Quest suenter che la polizia n'era betg intgantada da lur hobi en il spazi public. Davent da l'onn 2009 datti l'associaziun, 2013 ha il club construì ina plazza per dar golf-ballape à Saint-Cergue en il chantun Vad.

Julien Babel ha er organisà plirs onns il turnier internaziunal «Europeen Footgolf Tour» sco er il turnier ch'è sa fermà à Mustér. En Svizra existan per il mument otg clubs. La davosa plazza da «footgolf» è vegnida averta quest onn a Oberkirch en il chantun Lucerna.

Sper las activitads dils Genevrins è ils sport er sa sviluppads en auters pajais. Il sport ha in'associaziun internaziunala. Ils giugaders sa participeschan tar turniers sur cunfin. Il pli grond eveniment da quest onn è la cuppa mundiala ad Orlando en ils Stadis-Unids stada.

Impressiuns tal golf-ballape

Il sport è restà populars e vul er mantegnair la vart divertenta. Bain che l'associaziun vuless far ord dal golf-ballape ina disciplina olimpica, resta il sport vinavant attractivs per famiglias e gruppas. Ils blers clubs organiseschan eveniments per gruppas che fan barlot ni era per eveniments da firmas.

Autras modas da dar golf

Or da l'archiv: