Jeremy Freiburghaus ha terminà la stagiun sin la Challenge Tour sin il segund plaz. Uschia daventa il proxim pass realitad. Il 2023 dat el ils turniers dal DP World Tour (anteriur European Tour). Quai è la segund auta seria da turniers da golf dal mund.
Da plaz 2100 sin 300
Jeremy Freiburghaus è dapi 4 onns profi da golf. Avant che metter tut sin la charta golf ha el fatg in emprendissadi d'informaticher. Cumenzà a dar golf ha el sco buobet. El è quasi creschì si sin il plaz da golf a Domat. Ses bab Philippe è scolast da golf e dentant ses trenader e coach. En quels paucs onns sco profi ha Jeremy Freiburghaus fatg in grond sigl en la rangaziun mundiala. Cumenzà sco numer 2100 è el uss la numer 300 dal mund. Sin il DP World Tour è el cun ses 26 onns in dals giuvens.
Scriver istorgia da golf svizra
Uss ina giada s'etablir sin il DP World Tour che vegn ad esser anc pli professiunal. Dapli turniers e viadis e quai intercontinental. Jeremy Freiburghaus, ch'è creschì si a Panaduz, ha mai zuppentà sias ambiziuns. S'avanzar en il ravugl dals top 100 golfists dal mund ed avisar la pli gronda ed impurtanta seria da turniers dal mund, il PGA Tour, e scriver istorgia da golf per la Svizra.
