L’emprim Indoor Festival è stà il 2003, l’ultim il 2011. Uss vul il comité d’organisaziun puspè realisar ina ediziun, e quai ils 7 ed 8 da matg 2021.
Dar in segn positiv
Ils placats per quest eveniment musical pendan gia. L’idea saja stada dad ir avant Nadal en la prevendita cun l’entir program, era per nizzegiar ch’ils turists sajan qua. Quai di Florian Zanin, il president dal comité d’organisaziun dal Indoor Festival.
Nus lain dar in segn positiv ch’i dat forsa in zic speranza per il futur.
1'000 bigliets
En vista a la pandemia veglian els vender mo 1'000 bigliets. Plaz avessi per 2'000 persunas en la sala gronda dal Center Fontauna, di Florian Zanin. E forsa stoppian els era resguardar tschertas mesiras sco purtar mascrinas u parter la sala en secturs. Ma i na saja betg dal tuttafatg segir, sch’els possian propi organisar quest eveniment.
Fin da favrer è la deadline che nus stuain dir, ristgain nus d’organisar u dain nus giu.
Preventiv: 160'000 francs
A quest festival sa preschentan set gruppas, tranter auter era gruppas rumantschas: Aurelius e Sirius e La Pascal Gamboni Combo Crassira. Ils contracts cun tschintg da quellas gruppas èn gia suttascrits. Il preventiv munta a 160’000 francs.
