Musica - In viadi musical tras l’istorgia da musica da la Surselva

Cumenzà il viadi musical en la sala Cristalla a Sedrun ha Pascal Gamboni. E la musicologa Laura Decurtins ch’è vegnida accumpagnada musicalmain dad Astrid Alexandre ha cumenzà a raquintar da tut quellas melodias rumantschas ch’èn naschidas or da testas sursilvanas e vegnidas chantadas per part entirs tschientaners. «Uschia sa ferma il viadi a Segnas, nua ch’il cumponist Duri Sialm ha dà notas al cudesch da chant «La consolaziun da l’olma devoziusa» ed ha uschia remplazzà la rolla da las prim-chantaduras da mintga vitg che chantavan tut las chanzuns e tuttas strofas ordadora», di Laura Decurtins.

Ed il viadi va vinavant cunter Mustér, nua che la musicologa raquinta da la claustra da Mustér cun ina tradiziun musicala che va enavos fin l’anno 800, ma ch’è era stada la naschientscha da la musica da rock rumantscha e da la famusa gruppa Furbaz. E mintgamai interpretescha Astrid Alexandre las chanzuns en ina moda melodiusa e singulara.

Da Rabius sur Trun fin en Lumnezia

Ed il viadi musical cuntinuescha cun Rabius e las chanzuns da Chiara Jacomet e Mario Pacchioli, sur Trun, cun Carli Decurtins che ha scrit l’emprima ediziun da la «Consolaziun da l’olma devoziusa» fin tar Clau Scherrer cun sia entira famiglia musicala. Lura va la via sur Sursaissa cun l’Opera Viva, giu Tavanasa tar la famiglia Caduff e la «Compagnia Rossini», fin a Rueun tar Corin Curschellas. Lura va la via a Glion, nua che la gronda lavur d'Alfons Maissen vegn menziunada. El ha ramassà bleras melodias rumantschas e registrà ellas, uschia che nus pudain era oz anc tadlar ellas. E la finala va la via en Lumnezia, danunder ch’il cumponist enorm productiv Gion Antoni Derungs è oriundamain.

La ragisch da la chanzun rumantscha

Suenter va il viadi curt en Stussavgia, nua che la musica da corda cun violinas ha tradiziun, sur Laax cun Flurin Camathias, fin a Flem nua che la chanzun dal Gion Paul da Flem vegn recitada da la chantadura. Ina chanzun che regorda fitg a l’emprima chanzun rumantscha, quella da la «Sontga Margriata». E Laura Decurtins raquinta co ch'il scienzià Hans Indergand ha chattà en Lumnezia anc ina dunna ch’enconuscheva la melodia da la chanzun da la «Sontga Margriata» – senza quella registraziun n’enconuschessan nus betg la melodia da l’emprima chanzun rumantscha. Ed uschia va la via enavos sur il pass dal Cunclas a Trin, nua che l’emprim chor maschadà è vegnì fundà, sur Domat nua che la pli veglia musica instrumentala dal chantun è vegnida fundada, fin a Cuira nua che la via musicala finescha. E Laura Decurtins raquinta co ils cumponists sco Gion Antoni Derungs ed auters han chattà la dimora a Cuira ed uschia era la chanzun rumantscha che vegniva tgirada surtut da differents chors rumantscha a Cuira.