Sch’i va tenor ils plans da l’Armada svizra, lura vegni bainprest a dar dronas da cumbat «Made in Switzerland». Dapi il zercladur passà datti ina gruppa da lavur «dronas» sut la batgetta da l'Uffizi d'armament Armasuisse, da l’Armada Svizra e dal Secretariat general dal departament. Quai per sviluppar e producir atgnas dronas da cumbat ed uschia minimar la dependenza da producziuns estras, communitgescha l’Uffizi per armament.
Las emprimas dronas da cumbat
Questas dronas duessan en emprima lingia cumbatter objects terresters, ed en segunda lingia objects ord l’aria sco par exempel defender dronas encunter dronas. Enfin ussa n’ha l’Armada svizra betg dronas da cumbat, mabain dronas d’exploraziun dal tip Hermes 900 HFE.
Tenor retschertgas da la NZZ am Sonntag (NZZaS) vul l’Uffizi d’armament Armauisse investir radund 47 milliuns francs. Fin il 2027 vul l'Armada svizra esser abla da duvrar dronas armadas sur lungas distanzas en cas d'ina situaziun extraordinaria, ha declerà il viceschef da l'armaziun Thomas Rothacher envers la NZZaS.
La Val Cristallina è vairamain ina opziun.
Ils emprims tests duain cumenzar l'auter onn. En dumonda vegn era la plazza da tir en la Val Cristallina sin il territori da la vischnanca da Medel.
Vischnanca da Medel Lucmagn na sa però anc da nagut
L'Uffizi d'armament testescha gia dapi il 1986 muniziun en la Val Cristallina - quai durant var trais emnas ad onn. L’Uffizi per armament e la vischnanca han per quels tests da muniziun in contract che vala enfin l’onn 2039. L’Uffizi n'haja anc betg contactà la vischnanca, ha ditg il president communal Claudio Simonet ad RTR. Tenor el saja quai ina chaussa d’interpretaziun e da discussiun, sche tests da dronas e tests da muniziun giajan sut la las medemas cundiziuns dal contract.
Sch’igl avess da dar dapli emnas da test en la Val Cristallina, lura stuessan ins guardar, co sa cunvegnir cun las alps.
En mintga cas stoppian l’economia d’alp sco era il turissem vegnir infurmads baud avunda, sch’i dettia en l’avegnir tals tests da dronas en la Val Cristallina. In ulteriur aspect: Sch’i dess ultra da tests da muniziun anc tests da dronas, duvrass l’Uffizi d’armament dapli dis a disposiziun per ils test. Quai procurassia tar il stan actual per conflicts cun las alps.