L’interpresa d’electricitad Axpo planisescha in'ulteriura ovra solara alpina en il territori da skis da Mustér. Planisada è in'ovra alpina che produciss energia per radund 4’000 chasadas sin ina surfatscha da radund 10 plazzas da ballape. Uschia ha l’interpresa orientà ier saira il parlament da la vischnanca da Mustér. Las pendicularas da Mustér han grond interess da surpigliar en l’avegnir l’electricitad da l’ovra solara planisada «Magriel». Sche quai fiss en il futur il cas, restass anc adina electricitad per radund 3’000 chasadas, quai han ils responsabels da l’Axpo ditg a la sesida dal parlament.
Avantatg è l’infrastructura existenta
En il territori planisà èn grondas parts da l’infrastructura gia avant maun. Uschia pudessan ins profitar da lingias gia tratgas per ils cundriz da far naiv. Era è il territori gia uss influenzà fitg tras activitads da sport d’enviern e perquai era optimal da far talas construcziun en il territori alpin, uschia ils responsabels da l’Axpo. Els hajan gia gì contact cun pliras organisaziuns d’ambient e quellas hajan tuttas mussà interess da realisar quest'ovra, surtut perquai che l’influenza umana è fitg preschenta en quest lieu. Uss stoppian vegnir fatgas tut las lavurs en connex cun privels da lavina e la finala er elavurar il concept da manaschi, quel finanzieschia l’interpresa d’electricitad. Co ils custs d’investiziun en in pussaivla ovra vegnan repartids na saja il mument anc betg decis, ma la vischnanca ni auters investiders era privats sajan segir bainvegnids per gidar da finanziar tut, uschia ils responsabels da l’Axpo.
Nizzegiar sinergias era cun Nalps
L’interpresa d’electricitad ha gia planisà ina sumeglianta ovra solara alpina en la val Nalps. Il lieu a Magriel e da Nalps haja il mument la medema prioritad e quai saja ina fitg auta, era vegnian ins a pudair profitar d’infrastructura sche omaduas ovras vegnissa realisadas, uschia Ruedi Büchi, il manader da las ovras Reinanteriur ch’appartegnan a l’Axpo. La finamira da l’interpresa saja da realisar ils proxims onns plirs projects solaras, betg be en las Alps, ed ils dus projects sisum la Surselva furmian ina fitg impurtanta part da questa strategia.
Finamira è da cumenzar il 2024
Las lavurs da preparaziun e la dumonda da construcziun stoppian vegnir pli spert pussaivel sin maisa per pudair cumenzar gia il 2024 cun las lavurs. En las muntognas è la fanestra per realisar lavurs da construcziun pitschna e sch’ins veglia realisar quellas ovras alura stoppian ins cumenzar il 2024 immediatamain suenter che la naiv e svanida. La finamira è da realisar sin la fin dal 2025 almain ils 10% da la producziun ed uschia pudair profitar da las subvenziuns federalas.
Parlament da la vischnanca
Sper l'orientaziun davart l'ovra solar ha il parlament da vischnanca approvà il quint da l'onn passà. La vischnanca da Mustér ha fatg l'onn passà in gudogn da 145'000 francs tar expensas totalas da radund 17 milliuns. Plinavant ha il parlament approvà in deposit da 2,2 milliuns francs per il project Center Fontauna ed in ulteriur deposit da 100'000 francs per spazi d’abitar per indigens.