Dapi blers onns discurr’ins en Lumnezia d’in hotel cun plazzas pli grondas che mancan. A la radunanza communala dal venderdi saira hai dà in'infurmaziun davart l'iniziativa ed il progress dals plans per ina surbajegiada dal parcadi da las pendicularas.
Probablamain èsi stada la tractanda ch'ha interessà il pli fitg ils preschents. A l’emprima radunanza communala dal 2025 ha il president communal, Daniel Solèr, beneventà 127 votantas e votants. El e ses collegas da la suprastanza han era beneventà dus represchentants da la cuminanza d’interess «Valurisaziun dalla staziun a val da las pendicularas a Vella». Orlando Menghini, sviluppader da territori, e Gian Fanzun, architect, han declerà co l’idea per in hotel a Zignaus a Vella è sa sviluppada.
Il concept è sin maisa
Il president communal ha ditg che la vischnanca na po betg daventar activa en questa chaussa. Per l’idea d’in hotel hai duvrà l’iniziativa privata, a la vischnanca mancian numnadamain las resursas e cumpetenzas. Uschia ha ina gruppa d’interess inizià in process per valurisar l’areal a Zignaus. Da quella fan part Andreas Hämmerle, Simon Osterwalder, Gian Derungs, Elmar Collenberg sco era Norbert Cavegn sco represchentant da l'hotel Pellas en la vischinanza.
La vischnanca ha in pled en connex cun la planisaziun dal territori e midadas da zona. La zona actuala na lubescha betg da bajegiar in hotel. La Fundaziun ecclesiastica Caplania posseda la maioritad dal terren. Tuts èn d’accord da sviluppar in concept per ina surbajegiada.
Planisaziun e gruppas da lavur
Il planisader Orlando Menghini ha descrit la situaziun da la planisaziun e tge pass ch’èn necessaris per realisar il project. La gruppa d’interess ha organisà dus lavuratoris cun experts d'hotels ed architects. Ils represchentants da la vischnanca han accumpagnà il process.
45 milliuns francs
L'architect Gian Fanzun ha ditg che la cuminanza d’interess n’haja anc betg pudì tschertgar investurs. Lur pensum saja stà da far in studi per ina surbajegiada. In project pussaivel è ussa sin maisa e Gian Fanzun ha preschentà il model ed il studi. El ha ditg ch’ins discurria d’investiziuns d’enturn 45 milliuns francs. Il project duai includer in hotel da 3 stailas cun circa 150 chombras.
Duas chasas da trais auzadas
Per finanziar l'hotel dovri ina cumpart d'abitaziuns secundaras. Ina garascha sutterrana cun 200 parcadis duai remplazzar la surfatscha actuala. Il president communal ha infurmà ch’ins haja guardà l’aspect dals parcadis supplementars durant la stagiun auta d’enviern. Il concept architectonic prevesa duas chasas principalas cun mintgamai trais auzadas. Ina segunda part dal project includa il schlargiament da l'hotel Pellas cun 24 novas chombras.
Entaifer diesch onns
Il president communal ha ditg, che la cuminanza d’interess haja organisà e pajà tut las lavurs fin uss. La vischnanca e la cuminanza d’interess han fixà ina cunvegna per la planisaziun locala. Sch’il project vegn realisà entaifer diesch onns vegn la cuminanza d’interess a restituir a la vischnanca ils custs da las lavurs da planisaziun. La vischnanca po vegnir activa, cura ch’in investur è avant maun e fa la dumonda per ina midada da zona.
Decisiuns da la radunanza communala:
Cumpra d'ina immobilia
Venderdi saira ha la radunanza communala decidì da suttametter la dumonda da cumprar ina chasa ad ina votaziun a l’urna. 124 dals 128 preschents han sustegnì da cumprar la «Casa dil pec», sco quella vegn numnada. En la chasa a l’entschatta dal vitg datti trais abitaziuns ed era las localitads da la pasternaria che furnescha paun e patissaria en l'entira val. La votaziun a l’urna è previda il settember 2025.
In stan da mulscher per l’alp Sezner
Per ademplir las perscripziuns per la protecziun da l'ambient e da las auas survegn l’alp Sezner ina remedura. Sin l’alp, nua che bun 100 vatgas vegnan alpegiadas, e nua ch'i vegn producì chaschiel, vegn installà in nov stan da mulscher. Plinavant vegn montà in indriz solar e construì ina tualetta publica. Il credit da 880’000 francs ha la radunanza approvà cun grond pli.
Sanaziun da Vias
Era senza gronda discussiun ha la radunanza approvà dus credits per sanaziuns da vias. Quels pertutgan la sanaziun d’ina via en il vaschinadi a Degen da 300’000 francs, e la sanaziun da la via da guaud en la fracziun da Tersnaus per 1,8 milliuns francs.
Project d'hotel a Vella
Ils preschents da la radunanza èn era vegnids infurmads davart in project per in hotel sin la parcella amez il vitg, nua ch'ils parcadis da las pendicularas sa chattan. Planisà è in hotel cun var 100 enfin 120 chombras. Per pudair realisar quai project sto la vischnanca dentant l'emprim adattar la planisaziun da zonas communala.