Durant la controlla da la muntanera ha il pastur da l’alp Pastirasu da Degen en Lumnezia chattà in vadè nov naschì ch’era per part magliads.
Mazzà u crappà?
La dumonda cardinala che sa tschenta è, sch'il luf ha stgarpà il vadè ni sche quel era gia crappà avant ch'il luf ha maglià. Per sclerir quella dumanda èn las restanzas dal cadaver vegnidas transportadas en la patologia da l'uffizi veterinar a Cuera. Quel emprova dad eruir co il vadè è crappà. Tut tenor il resultat che la examinaziun porta a la glisch vegn definì tge mesiras ch’en da prender. Era il vadè gia crappà avant ch'il luf ha maglià vidlonder, alura schabegia nagut. Ha il luf stgarpà il vadè, vegniss il cas annunzià a la Confederaziun.
Sco Adrian Arquint ha detg a RTR quinta igl uffizi da chatscha e pestga ch'i sa tracta el cas da Degen dad in luf singul che sa mova sin il territori da la Lumnezia.