Da la vart grischuna è la via dal Pass Lucmagn vegnida meglierada successivamain ils onns passads e cun la prolungaziun da la gallaria dal Scopi sco era cun lavineras a Stgegia è era la segirtad sa meglierada. Quai ha custà 110 milliuns francs. Uss datti era moviment en quai champ da la vart dal sid dal pass.
Il chantun Tessin preveda numnadamain da construir lavineras temporaras e da regiuvinar il guaud en il territori tranter Campra ed Acquacalda/Casaccia. Il perimeter pertutgà cumpiglia ina surfatscha da 145 hectaras. Per quai èsi prevesì d’impunder 15,5 milliuns francs. «La finamira è da pudair cumenzar cun las lavurs da construcziun l'atun 2024 u la primavaira 2025», di Daniele Barra, inschigner forestal e responsabel per il revier Val Blenio.
Il parlament tessinais vegnia anc la primavaira a decider sur dal credit, ha Fabrizio Conceprio da la cumissiun tecnica confermà sin dumonda da RTR. La fatschenta na saja betg dispitaivla.
Gia en funcziun quest atun vegnan novas pitgas da siglientar lavinas en ina plaunca exponida da lavinas ad Acquacalda. Sin fundament da quests projects duai la via dal pass daventar pli segira da la vart tessinaisa. Gist en il lieu pertutgà da las mesiras prevesidas ha il privel da lavinas adina puspè impedì il traffic.
