A Laax vegn il traffic pli segir e ruassaivel. Quai è la finamira d'ina investiziun gronda che la regenza grischuna fa a Laax, sco ella scriva sin sia pagina d'internet.
Per l'ina vegn la via chantunala tranter Laax Marcau e Laax vitg schlargiada. Damai ch'igl ha chasas sin la vart dal culm, vegn ella schlargiada envers la Ruinaulta. Quai fa da basegn da construir novs fundaments sin questa vart.
![Laax](https://www.rtr.ch/static/cms/images/960w/422d65.jpg)
Da nov datti lura ina via da peduns e pedunas sper la Via Alpsu, ch'è sin la vart da la Ruinaulta. L'entir project custa 14 milliuns francs. Suenter il schlargiament vegnia la ladezza da la via a correspunder a la norma tenor il program da bajegiar vias chantunal. In milliun franc dals custs vegn la vischnanca a surpigliar.
Canera ed emissiuns
La regenza lubescha era mesiras cunter la canera. Tranter la rundella Lag Isla e la cruschada Via Runs è la limita da tempo da nov 50 kilometers per ura. Sin la via Murschetg tranter la rundella Lag Isla e l'hotel Signina vala da nov ina limita da 60 kilometers per ura. Fin uss era la limita da tempo sin quests tschancuns 80 kilometers per ura e per part 60 kilometers per ura.
Il chantun menziunescha sin sia pagina er, che las limitas d'emissiuns vegnian surpassadas en 54 lieus. Da quai sajan 888 persunas a Laax pertutgadas. Plinavant vegnia surpassà en 24 lieus la concentraziun d'emissiuns alarmanta. Da quai sajan 454 persunas pertutgadas.