Dapi plirs onns dominescha la channa, il uschenumnà «Schilf» il maletg dal lai. Quella impedeschia ch’autras plantas possian sa sviluppar sco giavischà, di il responsabel dal project Peter Weidmann. Per uss pudair mantegnair la biodiversitad datti dapi il 2018 in concept da tgira che prevesa da tagliar la channa en plirs lieus ed uschia stgaffir il mosaic original. Quai saja gist il pli prezius, ch’ins chattia qua ina palì cun channa, ma era prads bletschs, prads sitgs, guaud, chaglias e la finala era aua libra, quest mosaic porschia plaz da viver per pliras fluras protegidas e per animals fitg stgars. Uschia vivia qua il giomber grond, ed era per exempel il telpi, uschia il guardiaselvaschina responsabel Gieri Derungs.
-
Bild 1 von 9. Il lai dal Oberst è per gronda part ina palì. Bildquelle: RTR, Gionduri Maissen .
-
Bild 2 von 9. Il guadiaselvaschina Gieri Derungs mussa il giomber che viva en la palì. Bildquelle: RTR, Gionduri Maissen .
-
Bild 3 von 9. Pards da la palì èn vegnidas segadas, autras vegnan laschadas. Bildquelle: RTR, Gionduri Maissen .
-
Bild 4 von 9. Las structuras multifaras fan unic quest biotop. Bildquelle: RTR, Gionduri Maissen .
-
Bild 5 von 9. La channa crescha ad in crescher e dominescha sch'ins na tgira betg la palì. Bildquelle: RTR, Gionduri Maissen .
-
Bild 6 von 9. Animals che vivan en la palì, d'ina vart il telpi da l'autra la beccasina da palì. Bildquelle: RTR, Gionduri Maissen .
-
Bild 7 von 9. Senza l'agid da la protecziun civila na pudessan ins betg far las lavurs. Bildquelle: RTR, Gionduri Maissen .
-
Bild 8 von 9. Las auas vegnan l'entir onn en il lai, ma vesair l'aua na pon ins quasi betg. Bildquelle: RTR, Gionduri Maissen .
-
Bild 9 von 9. La protecziun civila vida far las lavurs da tgira. Bildquelle: RTR, Gionduri Maissen .
Senza la tgira sminuescha la biodiversitad
Il chantun è obligà da tgirar las palids da muntada naziunala. En il Grischun sajan las bleras palids protegidas sur il cunfin dal guaud, qua a Laax hajan ins ina palì sin rodund 1’000 meters sur mar e la biodiversitad saja immensa, di il responsabel per ils biotops tar l’Uffizi chantunala da l’ambient e la natira Luis Lietha. Perquai sajan els leds che la protecziun civila porschia maun. Ils ultims dus onns hajan ins segà la palì duas giadas ad onn, cun agid d’in pur. Quai vegnia uss a sa midar e la tgira vegnia alura sminuida sin ina giada per onn, e la finala saja la finamira ch’il pur possia far quella tgira senza agid da la protecziun civila, sche pussaivel, uschia Lietha.
Tut è in relict da la bova da Flem
Sa furmada è la palì suenter la bova da Flem avant 9’500 onns. Il material da la bova ha furmà pliras foppas e planiras. Cun las auas che naschan en la regiun che portan sediments fins saja sa furmà il «Lag dal Oberst», uschia Peter Weidmann. La primavaira s’emplaina il lai mintgamai cun aua da naiv, en il decurs dal onn vegnia pli e pli sitg. Sulet ina pitschna part resta aua averta, nua che per exempel ils giombers ed amfibis chattan lur habitat. Era la channa è ina planta indigena che po sulet surviver en in tal lieu, ma sch’ella dominescha alura na pon naginas autras fluras surviver. Perquai sto ella vegnir tgirada.