Il festival da musica haja gì dapli public che l'onn passà. E quai motiveschia er da cumenzar il proxim onn, di Florian Zanin, president dal comité d'organisaziun da l'Indoor Festival. Venderdi èn 540 persunas vegnidas, Sonda 790. Ins possia discurrer d'in success.
Cun uschè bler persunas hani betg quintà. Cler èsi dentant er che quai na tanschia betg da cuvrir il deficit da l'onn passà da 10'000 francs. Vi dal program da musica sa regorda Zanin uschia: «Jau hai gudì il pli fitg Kamrad, el è stà sin tribuna cun in'extrema energia.»
Mo 900 visitadras e visitaders l'onn passà
L’onn passà ha il comité d’organisaziun dal Indoor Festival a Mustér reactivà suenter 10 onns pausa ils concerts en la halla dal center Fontauna. Spetgà avevan ils responsabels dapli aspectaturas ed aspectaturs, ha Florian Zanin ditg. Per eruir ils motivs han ils responsabels tramess ina enquista online che radund 170 persunas han respundì. Or da quellas respostas han ins lura empruvà da chattar meglras soluziuns.
Pretsch pli bass e bands or da la parada da hits
In dals puncts ch’èn sa cristallisads or dals resultats da l’enquista è il pretsch d’entrada. Qua hajan ins uss reducì per dapli che 20% il pretsch per il pass da dus dis dal festival. Er hajan ins engaschà in DJ per la musica suenter ils concerts, e la finala engaschà bands ch’ins auda er dapli en la parada da hits u en il radio, accentuescha Florian Zanin. Er cun las uniuns da giuventetgna da Mustér e Tujetsch han ins organisà in inscunter per declerar daco ch’ins na po betg engaschar bands pli enconuschentas, u er daco ch’in pretsch aut d’entrada è necessari. Uschia hajan ins empruvà da sensibilisar la giuventetgna ed il medem mument d’activar els da vegnir al festival.
Bligg, Kamrad, Pronto ed EAZ
Las bands ch’il comité d’organisaziun ha engaschà quest onn han il mument per part grond success. Per els saja quai adina in zic sco da dar lotto d’engaschar bands. Ma quest onn è la musica orientada pli fitg a la parada da hits che per exempel l’onn passà. La prevendita è stada almain meglra che quella dal 2022 e perquai er l’optimissem ch’il program attiria dapli persunas che l’onn passà, di Florian Zanin.
