Il cuser accumpogni ella gia dapi giuvna, di Cilgia Jacomet. Ella è scolasta dal fatg ed instruescha tranter auter scola da lavur e zambregiar. Avunda da fils e taila n'ha ella dentant betg: En ses temp liber cusa ella tastgas, satgados, etuis ed anc bler auter. Quai fa ella ensemen cun sia mamma Barla Jacomet. Lezza taissa tut las tailas che la dunna da 40 onns basegna per ils accessoris.
En la scola da puras avev’jau emprendì da taisser. Quai ha adina plaschì a mai. Insacura pli tard hai jau gì il giavisch da puspè entschaiver ed uschia èsi vegnì mes hobi.
In product unic
Sut il num «Da Nus» vendan ellas ils products e quai cunzunt a clientella che giavischa insatge unic. La gronda part sajan persunas enconuschentas ni da quels che vesian las fotografias ch’ella metti sin la plattafurma instagram, di Cilgia Jacomet.
Bildergalerie
-
Bild 1 von 4Legenda: Cilgia e Barla Jacomet cun intgins sa lur products RTR, Carmen Monn -
Bild 2 von 4Legenda: La bursa blaua che Cilgia Jacomet ha cusì durant la visita RTR, Carmen Monn
-
Bild 3 von 4Legenda: Cilgia Jacomet vid cuser en sia stanza da lavur RTR, Carmen Monn
-
Bild 4 von 4Legenda: In schatg dals products da Barla e Cilgia Jacomet RTR, Carmen Monn
In hobi communabel
Lavurar ensemen fetschia plaschair ad omaduas, di Barla Jacomet. Era sch’ellas n'abiteschian betg ensemen, sajan ellas bler en contact. Mintgatant saja ella schizunt surstada, tge che sia figlia cusi ord la taila ch’ella taissi, di la dunna da 64 onns.