Il furn appartegneva a las famiglias Caminada. Cun ils onns era el dentant ì en decadenza. Uschia ha la famiglia regalà il furn a la vischnanca cun la cundiziun ch’el vegnia mantegnì. 1995 è il furn restaurà vegnì inaugurà. L’entschatta faschevan pliras dunnas paun en il furn, ozendi è Ida Sgier la suletta che dovra el.
Mesirar la temperatura cun farina
Coier paun en in furn da laina pretenda tscherts trics. La laina sto avair la dretga mesira, la temperatura mesiran ins cun mirar, quant spert che la farina vegn brina, lavar ora il furn fan ins il meglier cun aua chauda, per ch’el na sa sfraidia betg. Tut quai ha Ida Sgier emprendì u da las antecessuras, da pasterners e pasterneras u cun l’experientscha.