Cun tut las vuschs da las 30 convischinas e convischins preschents a Rabius a la radunanza da vischnanca da Sumvitg è il project per ina saiv enturn il guaud da Puzzastg vegnida approvada. Uschia duai uss fin l’avust 2026 vegnir realisà ina saiv enturn il guaud per pussibilitar la regiuvinaziun ed uschia la protecziun dal guaud da Puzzastg. En tut vegn il project a custar 1,44 milliuns francs. Da quels vegn l’Uffizi chantunal da guaud e privels da la natira a pajar la gronda part, probabel 90%, uschia è vegnì infurmà dal president communal Patrick Schaniel. L’ultim pled en chaussa ha la populaziun da Sumvitg ils 24 da november.
Impurtanta funcziun da protecziun
Il guaud da Puzzastg sur il vischinadi da Surrein en la vischnanca da Sumvitg ha ina impurtanta funcziun da protecziun. Per ademplir quella dovri ina regiuvinaziun natirala dal guaud. Quella n’è dentant gia dapi blers onns betg pli dada. Cun pliras mesiras han ins vulì far frunt al problem, uschia per exempel cun intensivar la chatscha en questa part dal guaud. Ma il success n’era betg propi qua, uschia ch’ins ha uss decis ina mesira unica en il chantun Grischun e probabel en Svizra, ins tira ina saiv enturn l’entir guaud che dovra urgent ina regiuvinaziun.
Saiv da 2,5 meters autezza
La saiv da protecziun vegn tratga sur ina distanza da 2,8 kilometers e la saiv vegn ad avair ina autezza da 2,5 meters. La finamira è che tut la selvaschina d’ungla vegn sclausa ord quest areal ed uschia evitar ch’ella morda las frestgas fadetgnas dals pigns, uschia han ils responsabels declerà. Las lavurs duajan vegnir fatgas d’ina interpresa privata, ha ditg il selvicultur communal Beat Cadruvi. La gronda sfida è tranter auter il terren fitg stip, per l’autra era che las experientschas da realisar in tal project mancan. Ma quai saja era ina bella sfida da pudair realisar in project unic nua che segir er autras vischnancas vegnan a pudair profitar da las experientschas, uschia Beat Cadruvi. La saiv vegn construida per 40 onns per gronda part cun pitgas da metal e suenter quest temp duai lura tut vegnir refatg e la funcziun da protecziun surlaschada al guaud. Il guaud saja anc adina la meglra mesira per proteger cunter lavinas, sbuvaditschs ed auters privels da la natira, uschia il selvicultur.
Sco emprima vischnanca da la Cadi è Sumvitg per corporaziun communala
Er ha la radunanza da la vischnanca da Sumvitg decis da sa participar a la corporaziun da las vischnancas da la Cadi che duai vegnir fundada per vegnir da reglar e tractandar ils dretgs d’aua. L’idea è da vegnir da dar dumogn cun ina vusch communabla e cun la corporaziun nova a las proximas sfidas.
