Cura che la Scola da talents ha avert las portas l'onn 2009 è il resun stà grond. Entaifer ses emprims diesch onns è la scola creschida sin var 40 scolaras e scolars. Quella cifra è alura sa reducida sin sut 30 scolars l'onn 2018 – quai era pervia d'autras scolas, sco per exempel quella da Cuira ch'ha l'onn 2016 creà ina sumeglianta purschida.
La Scola da talents a Glion ha en il mument 34 scolaras e scolars. Il plaz è limità sin quest dumber e mintg'onn dettia ina glista da spetga. Quai muntia era ch'ins saja vegnids pli rigurus cun ils criteris. La grondezza saja uschia ideala, manegia la manadra da scola, Rita Bearth.
Nua avain ina buna grondezza, la dretga grondezza, uschia che nus pudain accumpagnar fitg bain ils scolars e las scolaras.»
La maioritad dals scolars èn sportists e sportistas, ma la scola è era fitg activa en la promoziun da la musica. Quai cun differents moduls da musica e saut.
Collavuraziun tranter las scolas da talents
La Scola da talents a Glion è l'emprima scola da talents en il Grischun. Suenter èn las scolas da Cuira, Champfèr e Tavau vegnidas vitiers. Surtut la scola da Cuira valeva sco concurrenta potenziala per la scola da Glion, ma la collavuraziun predomineschia, di Rita Bearth. Ins tschertgia era communablamain schliaziuns tranter las duas scolas cura ch'i va per chattar il plaz ideal per scolars areguard dal viadi da scola. Ins vegnia era quatter giadas ad onn ensemen cun tschellas scolas da talent tar in'occurrenza communabla.
Festa da giubileum cun «Wall of Fame»
Quest venderdi datti ina festa da giubileum cun osps envidads en la chasa da scola. Suenter quindesch onns po la scola era preschentar anteriurs scolaras ch'han gì success cun lur talents. Uschia vegnian ils sportists Andri Ragettli e Fadri Janutin, sco er il musicist Mattiu Defuns tar quest'occurrenza. Els survegnian in plaz fix sin la nova «Wall of Fame» – la paraid d'onur da la scola che duai servir sco motivaziun per ils musicists e las sportistas da l'avegnir.
