Radund in onn e mez han las lavurs da renovaziun da la «Casa Arpagaus» cuzzà. Naschì è in bajetg modern ed individual da 200 meters quadrat. Là vegn celebrà l'avertura da la nova biblioteca amez la citad veglia da Glion ils 10 d'avust – pia durant il «Ilanzer Städlifest». A partir da las 10:00 fin las 17:00 avra la biblioteca sias portas per tuts ch'èn interessads da dar in sguard en la nova localitad.
In lieu da leger, s'entupar e sa cumblidar
La biblioteca sa reparta sur duas auzadas. Construida è ella vegnida cun l'idea da crear differents spazis da scuntrada e refugi per scolas e scolaras, sco era per tut ils auters ch'èn fan da cudeschs. La nova localitad duai pia envidar glieud da tutta vegliadetgna da restar, sa cumblidar e giudair differenta litteratura. Las singulas stanzas sa drizzan a differentas gruppas. Al plaunterren sa chatta per exempel ina stanza ch'è vegnida creada specificamain per uffants giuvens. En la segund'auzada chattan ins ina stanza cun diversa litteratura per giuvenils e giuvenilas a partir da 10 onns.
Nus sperain che la populaziun vegn er ad utilisar la biblioteca sco lieu da scuntrada.
Spezial vi da la nova biblioteca: Grazia al sistem da «Open-Library» èsi era pussaivel da passentar là il temp suenter las uras uffizialas d'avertura – quai cun in abo correspundent. Uschia pon ins pia era duvrar la localitad – cun access al WLAN ed ad in computer da rechercha – sco lieu da lavur e d'emprender a partir da las 07:00 fin las 21:00. Cudeschs pon era vegnir empristads e turnads independentamain.
In bajetg cun valur istorica
Ferm involvì en las lavurs da renovaziun dal bajetg per la nova biblioteca era era la tgira da monuments. I saja vegnì mess gronda paisa sin il mantegniment da la structura originala dal bajetg, sco era sin in focus regiunal. En la chrombra da bellatristica sa chatta per exempel ina speziala tavlegià che consista or da lain, ch'è vegnì restaurà tras in expert da la claustra a Mustér.
La chombra principala da la biblioteca – «La Stivetta» – ha ina gronda purschida da literatura rumantscha u regiunala. La pigna tuatschina duai crear in'atmosfera empernaivla. La finamira saja era da carmalar persunas che s'interesseschan per l'architectura grazia a quests aspects spezials.
