Il parlament da Glion ha votà unanim d’exequir il dretg da precumpra da la surfatscha da 6’300 meters quadrats sin l’areal Maissen. Uschia po la suprastanza communala suttametter la fatschenta l’onn proxim al suveran che po alura decider definitivamain sche la vischnanca duai cumprar il terren da bajegiar. Bain che la dumonda n’è betg stada dispitaivla, han ils parlamentaris e las parlamentarias discutà davart il modus operandi da la cumpra. Cunquai ch’il messadi preschentà mesemna saira cuntegna gia cifras detagliadas, hai dà ina discussiun, sch’il messadi per las votantas e votants è uschia avunda detaglià u betg.
Mess en moviment la discussiun davart l'areal Maissen aveva il parlamentari Jan Berni cun ina dumonda a la suprastanza communala. La suprastanza ha alura prendì si la dumonda ed infurmà il parlament davart ses resultats en il favrer passà.
L’areal Maissen che sa chatta sper la via chantunala vers Castrisch visavi l’anteriur Center Mundaun, appartegn en il mument a la Repower. Lezza surpigliass en il cas d’ina cumpra da dismetter eventualas grevezzas veglias dals bajetgs existents. En il mument èn quels bajetgs affittads a terzas persunas.
Cun il consentiment dal suveran pudess la vischnanca cumprar la parcella per 5,65 milliuns francs. La vischnanca vuless en l’avegnir chattar ina investura ch’è pronta da construir abitaziuns pajablas en quest lieu ch’è ella vischinanza da la staziun. Quai cun ceder il terren en il dretg da bajegiar. Tenor las calculaziun da la vischnanca pudess ina zona d’abitadi per var 120 persunas vegnir construida en l'avegnir sin la parcella che sa chatta en la zona da coc.
Vischnanca cumpra indriz da provediment d’aua da la claustra da Glion
Il parlament communal da Glion ha plinavant approvà unanimamain la cumpra dal provediment d’aua cun l’ovra idraulica integrada da la claustra dominicana da Glion. La vischnanca po uschia cumprar l’ovra privata per 1,8 milliuns francs.
Quella procura per in’ulteriura quantitad d’aua annuala da 160’000 meters cubics, tge che segirescha il provediment d’aua era durant fasas da setgira. L'ovra idraulica latiers ha producì en ils davos quatter onns in equivalent d'energia per var 80 chasadas. La tschiffada d’aua e las funtaunas èn tenor la vischnanca vegnidas sanadas cumplettamain l’onn 2012. Il ulteriurs indrizs èn vegnids sanads, las lingias ed ils idrants parzialmain, l’onn 2012. La vischnanca surpiglia uschia il provediment d’aua e l’ovra idraulica davent l’entschatta da l’onn 2025.
Cumissiun predeliberanta per la revisiun da la planisaziun locala
La vischnanca da Glion è dapi l’onn 2015 vi da la revisiun da la planisaziun locala e dapi l’onn 2021 vi da dimensiunar la zona da construcziun. L’exposiziun da cooperaziun da la planisaziun locala cuzza enfin quest november. Suenter quella fasa duai ina cumissiun predeliberanta parlamentaria avair invista en la fatschenta, quai en funcziun consultativa. Il parlament ha elegì Jan Berni, Daniel Candinas, Sarina Casanova, Kurt Vieli e Thomas Zinsli en la cumissiun.
Or da l'archiv:
Cun la planisaziun da Glion è RTR gia sa fatschentà pliras giadas ils ultims decennis: