Mess en moviment la discussiun davart l'areal Maissen ha il parlamentari Jan Berni cun ina dumonda a la suprastanza communala. La suprastanza ha prendì si la dumonda ed infurmà il parlament davart ils resultats. L'areal Maissen giascha tranter la via chantunala che maina a Castrisch e la staziun da la Viafier retica. Il mument tutga la parcella a la Repower e dapi l'onn 2021 ha la vischnanca in dretg da cumpra per la parcella. La parcella è en ina zona maschadada che lubescha da construir tranter auter spazi d'abitar cun edifizis da quatter enfin sis auzadas. Il pretsch da cumpra è tar 900 francs per meter quadrat. Quai dat ina summa totala da cumpra da tschintg milliuns e mez per la parcella pertutgada.
Vischnanca vul dar giu parcella en dretg da bajegiar
Tenor las infurmaziuns dal president communal da Glion Marcus Beer na saja betg previs che la vischnanca finanziass sper la cumpra da l'areal era la surbajegiada. Previs èsi da dar giu la parcella en dretg da bajegiar ad in u plirs investurs. Uschia generass la vischnanca tschains per quels dretgs che fissan segirads a lunga vista. Co la surbajegiada duai vesair ora e tgi che vegn en dumonda da far quella n'è il mument betg definì. La finamira è da constuir spazi d'abitar per augmentar l'attractivitad da Glion sco center.
La discussiun en il parlament ha mussà che quel sustegn la proposta da la suprastanza da vulair cumprar l'areal. Peda da far quai ha la vischnanca da Glion enfin ils 30 da zercladur 2026. Suenter scada numnadamein il dretg da cumpra per la parcella.
In sguard enavos
Cun l’areal Maissen pudess in ulteriur spazi sin l’intschess da Glion midar pulit la fatscha dal center da la citad. Avant paucs onns ha l’areal vegl da la posta fatg plaz a la surbajegiada nova per la Migros, la posta ed autras stizuns. Pliras giadas è RTR sa fatschentà ils davos decennis cun la planisaziun da Glion:
Nov president per il parlament
Il parlament da Glion ha elegì Daniel Candinas da Rueun sco nov president dal parlament communal. El daventa uschia successur da Gierina Gabriel. Tenor turnus maina il president u la presidenta mintgamai dus onns il parlament. Daniel Candinas ha gia ina clera finamira tge ch'el vul cuntanscher en quest temp.
Ils davos onns hai dà ina gronda largia tranter la populaziun e la vischnanca. Quella largia stuain nus guardar da puspè serrar.
Sco vicepresident dal parlament è Flavio Elvedi da Glion vegnì elegì e sco dumbravuschs Tarcisi Cavigelli da Siat. Quellas trais persunas furman il biro parlamentar che prepara las sesidas dal parlament.
