Il «Casti Grotta» è construì en in cuvel en il grip, uschia ha quai sulet duvrà da construir in mir davant si. La construcziun è spectaculara ed il chastè sin in grip è in dals unics en il Grischun. Tenor plirs perscrutaders saja la construcziun bain mantegnida ed haja parallelas cun ils chastels en il grip en la Val dal Blegn.
Nagina data da construcziun
I n’è betg enconuschent cura ch’il chastè è vegnì construì. Ins suppona en il decurs dal 12avel tschientaner. Era betg enconuschent è quantas persunas ch’abitavan en quest lieu spezial, ed era betg cura ch’el è la finala vegnì bandunà. Per vegnir en il chastè èsi dad ir a pe ed igl exista sulet ina entrada. L’entrada en il chastè era segirada ed i deva trais auzadas. Quellas pon ins anc oz distinguer. Il bajetg principal era sur duas auzadas. Uschia pon ins vesair fanestras ed en quellas bancs ch’envidan da seser e giudair la survista.
Istorgia da la famiglia «Kropfenstein»
Era sch’ins n’enconuscha betg la data da construcziun dal chastè, è la famiglia «Kropfenstein» documentada en l’istorgia. «Kropfenstein» è anc oz il num tudestg dal chastè en il grip. L’emprim represchentant documentà è Jacobus de Scrotenstein. El è vegnì mazzà il 1328 a Rueun. Probabel era el collià cun l’uvestg da Cuira. Sche quel ha construì il chastè na pon ins betg dir, era betg sch’el viveva en quel. Ils proxims onns chattan ins savens represchentants dals «Kropfensteins». Il pli enconuschent è Marquart. El è stà tranter ils onns 1438 e 1445 trais giadas «Landrichter» da la Lia Grischa, il pli aut uffizi insumma. Curt suenter svaneschan ils fastizs da la famiglia «Kropfenstein» e probabel è era il chastè vegnì bandunà da lez temp.
Miraglia sut il grip bain conservada
Ils mirs sut il grip han betg patì da bletsch e malauras. Uschia èn quels mirs sa mantegnids relativ bain sur tut quels onns. Il 1950 è l’access al chastè vegnì megliurà e l’onn 2000 èn vegnidas fatgas lavurs per segirar la miraglia.