La Gasetta Romontscha è stada durant passa in tschientaner la vusch da la Partida cristiandemocratica. Ella surprendeva las parolas da la partida e scheva, co ins stoppia votar e tgi eleger.
Betg ir ad uvar a perder
Sco vusch da la partida saja ella daventa la vusch da la Surselva catolica visavi ils liberals e Cuira ch'era politicamain e confessiunalmain ina minoritad, di Giusep Capaul. El è stà chauredactur da la Gasetta Romontscha da 1974 – 1990. Ina rolla impurtanta tar questa gasetta ha l’anteriur cusseglier naziunal Giusep Condrau (dr. Sep, sco el vegniva numnà) giugà. El è sta chauredactur da 1922 – 1974.
Nus stuain guardar che uschè paucs sco pussaivel giajan ad uvar a perder.
Serrar las retschas
La devisa era: Serrar las retschas. Lain illustrar quai cun in citat or da la gasetta dal 1935 a chaschun da las elecziuns dal cussegl dals chantuns e da la regenza grischuna:
Ed ussa: Si, vus umens en las valladas! Dumengia proxima main nus finadin a votar. Nus lain mussar che nus essan anc da veglia pasta. Mo alura hani respect da nus.
Tema da la lavina naira
La cuntrapartida aveva respect da la lavina naira, sco la pussanza politica cun la PCD da la Surselva vegniva numnada. Il resultat da questa politica è che la Surselva saja represchentada bain a Cuira ed a Berna, di Giusep Capaul. Era el ha cuntinuà durant ses temp sco chauredactur cun la lavur da la Gasetta Romontscha sco vusch da la partida.
Ed uschia era gì success, pertge che tut quests onns n'ha la Surselva pers betg in post da clav.