Il chantun beneventa ina fusiun da Vuorz ed Andiast cun Breil u Glion, preferiss dentant che omaduas vischnancas fusiunassan en la medem direcziun.
Ina fusiun da Vuorz en ina direcziun e d'Andiast en tschella direcziun na sustegness il chantun betg. Plinavant èn a Vuorz anc pendentas ina iniziativa che pretenda da sclerir ina fusiun cun Glion ed ina moziun che pretenda ina fusiun cun Breil. Ina situaziun cumplitgada.
-
Bild 1 von 3Legenda: Guido Dietrich, il president communal da Vuorz. RTR, L. Livers -
Bild 2 von 3Legenda: Sievi Sgier, il president communal d'Andiast. RTR, L. Livers
-
Bild 3 von 3Legenda: Ursin Fetz, Guido Dietrich e Sievi Sgier (da san.) durant la preschentaziun. RTR, L. Livers
Decisiun simultana
Omaduas vischnancas decidan ils 10 da zercladur 2016 dapersai, cun tgi ch'ellas vulan fusiunar. La vischnanca d'Andiast fa quai cun ina votaziun consultativa. La medema saira decida la vischnanca da Vuorz sur da l’iniziativa pro Glion e la moziun pro Breil.
Tenor Ursin Fetz, expert per fusiuns da vischnancas da la Scol'auta da tecnica ed economia (STE) a Cuira, tanschan las infurmaziuns avant maun sur da las consequenzas da quella fusiun per far las votaziuns. Propostas detagliadas da contracts da fusiun na duajan numnadamain betg vegnir elavuradas avant che las vischnancas han decidì cun tgi fusiunar.
Opiniuns divergentas
Cunquai che Vuorz ed Andiast vegnan a decider mintgin dapersai cun tgi ch'els vulan fusiunar, datti la pussaivladad ch'ils resultats da quellas votaziuns èn differents. Pia ch'ina vischnanca vul fusiunar cun Breil e l'autra cun Glion. En in tal cas vegniss il project da fusiun sistì.