Justina Simeon-Cathomas guarda enavos sin in presidi plain eveniments e sfidas. Ina sfida speziala saja stà il coronavirus. Quel haja mess tut in zic sin il chau, ma era fatg vegnir innovativ, uschia la presidenta che dat vinavant ses post il 7 d’avrigl. Ina sfida constanta, dentant er in plaschair cura ch'ins aveva success, saja era stà da finanziar differents projects. Il museum haja gì il cletg d’avair buns benefacturs.
Nus avain blera glieud che vegn. Quai fa plaschair.
Tar ils pli gronds success quinta Justina Simeon-Cathomas la conservaziun e renovaziun dal bajetg dal museum, sco era l'extensiun da la collecziun. In punct culminant saja stà da survegnir in grond legat cun ovras d’Alois Carigiet. Quai haja manà a pliras exposiziuns durant plirs onns. «Nus avain gì sanaziuns da la faschada, nus avain gì sanaziun dal tetg, nus avain puspè mess ina cuschina veglia en il stan sco quai ch'el era ina giada», uschia saja adina stà insatge da far, declera la presidenta da la fundaziun cun plaschair e satisfacziun.
Fascinada da la cumbinaziun d’istorgia e d'art
La presidenta dal cussegl da fundaziun vegnenta, Erica Cavegn-Pfister, porta novas perspectivas. Ella è en spezial fascinada da la cumbinaziun tranter l'istorgia locala e l'art.
L’istorgia e l’art, pudair cumbinar omadus en in bajetg che porta sez in’enorma istorgia: Quai è insatge fitg fascinant.
A curta vista vul Erica Cavegn-Pfister sa concentrar sin ina buna reavertura e sin las vernissaschas planisadas. Sonda, ils 5 d’avrigl, cumenza l’emprima vernissascha cun ovras da l’artist Fortunat Cagienard, enconuschent sco «Fortu C.». I suondia in program plain occurrenzas.
A lunga vista vul Erica Cavegn-Pfister sviluppar il concept dal museum. «Nus avain per l'exposiziun 2024 fatg plaz en il museum ed essan idas cun bleras chaussas, quai era per far plaz per novas ideas,» uschia la nova presidenta.
Novas purschidas ch’empermettan in surchombras plain vita
Il Museum Cuort Ligia Grischa a Trun extenda sia purschida. A partir da questa sonda porscha il museum ina stanza da films en l’anteriura stiva da l’avat. Il museum mussa films ch'han da far cun la regiun, cun ils artists da Trun sco era cun il bajetg sez.
Nus avain prendì sco fil cotschen l’istorgia da Maurus e Madlaina.
En las stanzas dal surchombras, nua ch’ils deputads avevan durmì pli baud durant il temps da la Ligia Grischa, datti uss in spazi per famiglias. Sa basond sin l'istorgia da Maurus e Madlaina pon ils uffants sa metter en differentas rollas e sviluppar lur creativitad. «Nus pensain che quai è uss ina purschida unica che vegn era a restar», uschia Erica Cavegn-Pfister.
Alura delegads, oz famiglias
-
Bild 1 von 4. En il surchombras durmivan pli baud ils delegads da la Ligia Grischa. Bildquelle: RTR.
-
Bild 2 von 4. Dapi quest onn è qua in spazi cun quatter stanzas per famiglias. Bildquelle: RTR.
-
Bild 3 von 4. Il motiv vegn mintgamai ad esser in cudesch d'uffants d'Alois Carigiet. Uonn èsi Maurus e Madlaina. Bildquelle: RTR.
-
Bild 4 von 4. Da vesair en in Museum Cuort Ligia Grischa: Las illustraziuns originalas dal cudesch Maurus e Madlaina. Bildquelle: RTR.