Els sajan dentant leds ch'il resort da vacanzas cun in lai artifizial na vegnia betg realisà, ha Ulrike Hörler ditg envers RTR. Ed i na fetschia era betg senn che la vischnanca da Flem preschentia ina cuntraproposta. Vitiers na veglian els era betg che la vischnanca demonteschia la halla da glatsch. E la finala hajan els era resalvas envers il project d'ina patinera avant l'Arena da la Chasa da guaud.
Dapli n'ha Ulrike Hörler da la gruppa d'iniziants betg vulair dir. La cuntraproposta da la vischnanca na saja gea betg anc concreta.
Suprastanza desista
La suprastanza communala da Flem aveva decidì da desister dal project «Prau la Selva Retreat». Sco quai ch' ella ha communitgà, saja l'opposiziun da la populaziun memia gronda. Il project cumpigliava in lai ed in vitget da palissadas.
Il medem mument ha la suprastanza era proponì da refusar l'iniziativa per mantegnair e revitalisar il center da sport Prau la Selva. Ils custs per quai schazegia la vischnanca sin var 15 milliuns francs, e quai saja memia bler, argumentescha la suprastanza. Davart questa iniziativa vegnan ils da Flem a pudair vuschar la primavaira 2020.
Dapli impurtanza per purschidas dal temp liber
La suprastanza elavurescha ina cuntraproposta a l'iniziativa che duai consolidar e reorganisar la purschida da sport e dal temp liber. Tranter auter duai il campadi vegnir schlargià e l'Arena da la Chasa da guaud duai survegnir dapli valur. En consequenza vegnia la halla da glatsch Prau la Selva cun excepziun da la garascha da parcar bajegiada enavos.
Sco project da pilot prevesa la suprastanza gia per quest onn ina patinera avant l'Arena da la Chasa da guaud. Sche quai sa cumprovia possia la populaziun vuschar pli tard davart ina schliaziun durabla, ha la vischnanca annunzià.
RR novitads 16:00
