L'onn 2007 ha Reto Gurtner, manader da l'Arena Alva ditg per l'emprima giada che la pendiculara da Cassons haja ina data da scadenza e vegnia serrada otg onns pli tard. Quai ha procurà per bain inqual reacziun. Tranter auter è l'uniun Pro Flem Cassons vegnida fundada. L'onn 2015 è la pendiculara vegnida serrada, il 2016 dismessa. Resumà pon ins dir ch'ils 8 onns n'han betg tanschì per planisar ina nova varianta per cuntanscher Cassons.
Broschura per regurdientscha
Cun la publicaziun da la broschura saja la dispita messa d'ina vart ed il chapitel serrà giu, manegia Arno Crucker il president da la Pro Flem Cassons. Las commembras ed ils commembers da l'uniun hajan sco serrà giu cun la pendiculara veglia e sa legrian sin la nova che saja sin buna via.
Sin las emprimas 20 paginas da la broschura vegnan a pled ils responsabels e las persunas directamain pertutgadas. Sin las 20 ulteriuras paginas raquintan persunas sur da lur aventuras cun la Pendiculara istorica.