L'onn 2025 ha cumenzà a moda fitg speziala per Gabriel Alig. L'um oriund da Vrin ha numnadamain festivà ses 100avel anniversari. Sch'ins inscuntra ad el dentant sin ina da sias spassegiadas quotidianas, na pensassan ins probablamain mai che quel um viva gia in entir tschientaner. Il Sursilvan ha numnadamain in dretg tempo sch'el è per via. 8’000 fin 12'000 pass per di è per el standard.
Ozendi consista ses moviment quotidian surtut da sias spassegiadas u dad in pèr minutas sin ses velo indoor. Avant paucs onns dentant è Gabriel Alig anc regularmain ì cun ils skis da passlung, cun velo u sin turas en muntogna. Cun 96 onns ha el numnadamain anc muntà il Piz Terri ch'è sin 3’149 meters sur mar.
Mia idea era da far anc ina davosa giada il Piz Terri. Jau hai savì ch’igl è tschintg avant las 12. Ma quai è ì senza difficultads.
Il recept per restar talmain fit – era en ina vegliadetgna avanzada – haja tenor el probablamain da far cun plirs facturs. Il moviment quotidian saja fitg impurtant. Vitiers haja el ina pressiun dal sang sco era in puls relativ bass. Ed in ulteriur factur decisiv sajan ils gens. Tant da la vart da sia mamma sco era da ses bab haja el survegnì bunas premissas per ina lunga vita.
Regurdanzas e reminiscenzas
Cun avair vivì gia in entir tschientaner ha Gabriel Alig vis sco ch'il mund è sa midà en tut quels onns. Cun ses emprim computer ha el avant radund 30 onns cumenzà a rimnar e notar reminiscenzas da sia vita. Blers da quels raquints derivan da ses temp sco guardia da cunfin. Quella lavur ha manà el durant 37 onns en ils pli differents lieus en l'entira Svizra.
Cura ch'el è stà a fin cun metter en scrit sias experientschas ha el regalà ses documents al Archiv chantunal. Quel ha vis il potenzial da quella perditga dal temp ed ha intimà Gabriel Alig da laschar far in cudesch ordlonder. Uschia è il Sursilvan cun prest 100 onns anc daventà autur.
Dapli istorgias persunalas datti er en l'emissiun da radio «Profil»