Fiera Son Martin - Ina tradiziun purila ch’ha survivì

Il di da Son Martin era pli da baud il di nua ch'ils purs pajavan lur debits, lur quints, perquai ch'il di da Son Martin avevan els daners en bursa. Lura era la raccolta sut tetg e la vendita d'ina vatga fatga. Quels temps èn sa midads, ma la fiera, il martgà tradiziunal è restà. Pli baud vegniva era vendida la biestga a Mustér e suenter vegniva cumprà chautschas tar il Giachen Bienmarcau. Quai è tut svanì, ma tge munta la fiera oz?

Lieu d'inscunter per tgirar contacts

Ozendi è la fiera Son Martin plitost in'occurrenza per s'inscuntrar e per vegnir en contact cun la populaziun e clients. I na giaja main per il vender sco tal, sco quai che Leonard Tenner, il possessur da la «Skigarage» a Mustér ha ditg envers RTR. El saja gia la 14avla giada a la fiera Son Martin e per el saja impurtant da mussar ch'el saja da return, perquai ch'el haja avert sia stizun – la Skigarage – be d'enviern. E cun esser preschent a la fiera, sappian ils clients e las clientas ch'el saja era quest enviern puspè da la partida. Sia situaziun saja forsa in zic differenta da quella d'auters. Auters vegnian forsa per vender bler. El vegnia per dir «hallo, bun di, jau sun qua». Era Leonard Tenner ha natiralmain rauba per vender sin la fiera. La clientella veglia però savens ina cussegliaziun pli detagliada en stizun sezza e cumpria perquai pir pli tard l'ina u tschella chaussa visa sin fiera.

Festa populara da fina bell'aura

L'aura na pudess betg esser meglra: in bellezza di d'atun. Las vendidras ed ils vendiders a la fiera Son Martin quintan cun blera glieud. Il cumportament da la glieud saja però sa midà. Blers vegnian pir cura che las temperaturas sajan in zic pli miaivlas, cunzunt sur mezdi, e betg gia la damaun baud, èsi d'udir a Mustér. Ed in di da festa è la fiera Son Martin era per ils scolars e las scolaras da Mustér. Els ed ellas han numndamain liber il suentermezdi e pon era giudair stans, sulegl e buna cumpagnia.