-
Bild 1 von 6Legenda: Ina fiera da biestga a Mustér sin l'areal da la staziun enturn il 1910. RTR, Flavio Huonder -
Bild 2 von 6Legenda: La fiera son Martin il 2013. RTR, Gion Hosang
-
Bild 3 von 6Legenda: Pius Bundi sa regorda da la fiera co ella era pli baud. RTR, Gionduri Maissen
-
Bild 4 von 6Legenda: La fiera son Martin cun ses stans per lung la via Lucmagn. ANR
-
Bild 5 von 6Legenda: In dals stans da dultschims da la fiera son Martin. RTR, Gion Hosang
-
Bild 6 von 6Legenda: Pli baud era la vita dictada dal ritmus agricul, uschia era la fiera son Martin la fin da l'onn agricul. RTR, Flavio Huonder
La fin da l'onn agricul croda sin l’atun e sin il di da son Martin ils 11 da november. Ils animals da niz vegnivan vendids quai di per pudair pajar ils debits ed ils custs da l’alp ed i vegniva cumprà il necessari per l’enviern che stat avant porta. In relict da quai temp è la fiera a Mustér.
Chaussas sa midadas
Antruras vegniva vendì e cumprà a la fiera da son Martin biestga e products agriculs, ma era pitschnas chaussas dal mintgadi, di Pius Bundi. Alura èn era vegnidas vitiers maschinas agriculas che la fatschenta dals Bundis vendeva durant quest di. Sco l’um da 92 onns di haja el bain fatg inqual buna fatschenta durant la fiera, uschia po el sa regurdar d’avair vendì 10 maschinas da segar.
La fiera d’oz n’ha quasi nagin connex cun quellas da pli baud. Pli baud vegniva vendì biestga e sulet quai di aveva il pur daners en satg.
Chaussas che n’èn betg sa midadas
La fiera da son Martin era il sulet di nua che la buobanaglia pudeva ir libramain enturn.
Era oz ha la buobanaglia liber il suentermezdi, sco dal temp da Pius Bundi. Lez è naschì il 1927 a Mustér ed ha vis bleras fieras il di da son Martin. Uschia era la buobanaglia l’entir di fatschentada cun ir a guardar e quai n’è fin il di dad oz betg sa midà.
Il «Giachen Bienmarcau» era la grond'attracziun
Surtut impressiun a l'anteriur fravi fascheva il «Giachen Bienmarcau» a mez il vitg. Quel era la gronda attracziun a la fiera da son Martin. Surtut per ils uffants. Mintg’onn vegniva l’um cun ses products ed attirava ina pluna glieud. El vendeva adina plirs products enina e martgadava cun mintgin. Sco Pius Bundi raschuna aveva il martgadant ina gronda chista cun en ils daners ed ils products eran multifars.
Ord l'archiv
Gia il 1985 è la fiera sa midada fitg cumpareglià cun pli baud:
RR actualitad 06:00