Sco um giuven e scolast aveva Johann Clopath cumprà in apparat da fotografar per 5 francs, in apparat che fascheva per smarvegl anc bunas fotografias. Questa passiun per il fotografar ha alura accumpagnà el tut quels onns surtut privat – ma lura era blers onns a moda professiunala cun far fotografias per exempel per la gasetta Casa Paterna. Quai di Johann Clopath ch’è stà blers onns er engaschà en differentas funcziuns per Radiotelevisiun Svizra Rumantscha.
-
Bild 1 von 7Legenda: Ils insects fotografads da Johann Clopath èn tuts stads da chattar enturn sia chasa a Trin e mussan ina varietad enorma. Daniela Derungs -
Bild 2 von 7Legenda: Ils insects fotografads da Johann Clopath èn tuts stads da chattar enturn sia chasa a Trin e mussan ina varietad enorma. Daniela Derungs
-
Bild 3 von 7Legenda: Mintga fotografia ha chattà ses spazi en ina da las diversas stanzas en la Casa d'Angel. Daniela Derungs
-
Bild 4 von 7Legenda: L’exposiziun vegn accumpagnada d’in cudeschet nua che tut las 55 ovras vegnan descrittas curt. Daniela Derungs
-
Bild 5 von 7Legenda: Da sanester: il manader da la Casa d'Angel Marco Coray, e Johann Clopath. Daniela Derungs
-
Bild 6 von 7Legenda: Ina part da las fotografias mussa l’aua en differentas furmas. Uschia èn da vesair fotografias cun aua schelada, aua en furma da nivels e aua en furma da daguts. Daniela Derungs
-
Bild 7 von 7Legenda: Las persunas èn vegnidas en rotschas per guardar las fotografias, per discurrer e s’inscuntrar. Daniela Derungs
Betg l’emprima exposiziun – ma la pli professiunala
Fin uss ha Johann Clopath gia pudì exponer pliras giadas sias fotografias. Ma per l’emprima giada è quai ina exposiziun gronda ed accumpagnada professiunalmain dal mainagestiun da la Casa d’Angel Marco Coray. Per quel èsi stà ina bella sfida da selecziunar las fotografias. Gia a l’entschatta saja Johann Clopath vegnì cun ina schelta da sias millis fotografias, ed els hajan alura pudì metter quellas en in narrativ per ch’il public possia giudair ellas. Uschia saja l’entira exposiziun partida en duas parts tematicas. Per l’ina trais furmas da l'aua: schelà, en furma da nivels ed en furma da daguts. E l’autra part da l’exposiziun è deditgada als insects, surtut als avieuls ed als baus da tuttas furmas e colurs, di Marco Coray. In mund pitschen e pir visibel cun pazienza.
Pliras fotografias vesan ora sco maletgs designads
Per Marco Coray che maina dapi radund in onn la Casa d’Angel èn las ovras ina chaussa speziala. El haja vis svelt che pliras ovras sajan enorm artisticas e perquai segir era spezialas cura ch’ins engrondeschia ellas. Ma uss che tut saja mess en buna glisch e pendia vi da la paraid, stoppia el era tar tschertas ovras guardar duas giadas per propi vesair sche quai èn fotografias e betg maletgs designads, di Marco Coray. L’ovra saja propi cumplexa e speziala e digna da vegnir exponida, ha l’um ch’ha studegià istorgia d’art ditg al public ch’è vegnì numerus a la vernissascha.
Exposiziun resta ils proxims trais mais
Per la Casa d’Angel è l’exposiziun era ina premiera. Uschia vegnan per l’emprima giada exponidas ovras da sulet in artist en l’entira chasa. Quai saja uss ina emprova per guardar co quai sa cumprovia. Sch’ils resultats èn buns, alura possia el sa metter avant da cuntinuar cun quest princip. Ma quai decidia la finala la cumissiun da la chasa ed el communabel suenter quels trais mais, di Marco Coray. Tge ch’ins po gia uss dir – l’exposiziun vasta è ina gronda satisfacziun per Johann Clopath. El saja led ch’il destin normal da las fotografias, numnadamain da restar sin il computer, vegnia uss interrut e che pliras da quellas han chattà la via en questa exposiziun.