Actualmain è il campadi a Mustér plain e radund 700 persunas chattan il mument lur da chasa en tendas, rulottas e mobils. Quai è per blers il pli bel temp dal onn. E mintgin ha sias preferientschas. Ils ins han in bus pitschen e dorman dasper en tenda, ils auters han ina gronda rulotta cun tenda davant ed uschia in pitschen da chasa sin rodas.
Sin in campadi datti era adina bler da far per tegnair en urden tut. Saja quai da segar, ir cun il rument u da gidar da parcar ils vehichels. Tge che quai munta, raquinta Armin Manetsch:
Dus bus da VW, in vegl – in nov
Duas famiglias cun bleras parallelas. Omadus han trais uffants e omadus han in bus pitschen ed ina tenda. Ma ils bus han differentas annadas. Uschia è il bus da la famiglia Kunz dal chantun Berna nov da quest onn e l’auter, quel da la famiglia Blumer ha gia fatg blers kilometers. Ma las sfidas ed ils plaschairs da las duas famiglias che fan vacanzas da campar èn sumegliants.
Il pli grond mobil
La famiglia Krummen or dal chantun Friburg ha il mument il grond mobil sin il campadi a Fontanivas. Els raquintan sur da las sfidas da metter sut tetg l’auto l’enviern.
Fittar in camper – u cumprar el?
Cumprar in busin da campar u era in pli grond, munta ad ina gronda investiziun. Radund 80'000 francs ston ins quintar per in model cun in pau equipament. Blers sa decidan perquai da l'emprim empruvar ora in tal vehichel durant in per emnas e fittar quel. Remo Huonder da Mustér porscha in tal service. Specialmain durant il temp da corona haja el sentì il boom, uss saja la dumonda ida enavos in zic. Blers tschertgian uss dentant in plaz per laschar ils vehichels sut tetg l'enviern.
Campar cun rulotta
La famiglia Held, ch’è sin viadi cun la rulotta, è gia stada in zic dapertut. Il pli lunsch era l’Ollanda, ch’ha plaschì fitg perquai ch’ils ollandais sajan ils experts da campar. Là hajan ils plazs da campar tut quai ch’ins po s’imaginar. Els èn vinavant gia stads en il Schwarzwald, en Svizra, ed en l’Italia. Il grond siemi da la famiglia saja dad ir insacura ina giada fin Scandinavia.
Tschertgar aur en il Rain
Dani dal Zugerland chava aur gia dapi 20 onns. El vegn mintg'onn si Mustér per far vacanzas e tschertgar aur en il Rain, ma el va era en auters lieus en Svizra per tschertgar. Ins na vegnia betg ritgs ma i saja in bun hobi sper la lavur dal mintga di, di el.
