Il problem ch'il grip – nua che la Via da Varduz passa – ruschna, na saja betg nov, di Marco Casanova, il manader dals menaschis communals da la vischnanca da Glion. Il territori vegnia surveglià e schubregià mintga primavaira. Il problem saja dentant daventà pli acut. La primavaira 2024 hajan ins constatà ina nova sfendaglia sur la via – in mussament per in moviment pli grond dal grip. Dapi in onn vegnia il moviment perquai mesirà. Sin fundament da quellas datas possian ins prognostitgar il svilup dal grip.
En ils proxims mais smanatscha il grip da rumper giu.
Ord motivs da segirezza resta la via serrada. I sa tracta d'ina stgaglia da grip cun ina lunghezza da 60 meters, autezza da 30 meters ch'è circa 5-6 meters grossa. En moviment èn prest 20'000 tonnas crappa. L'atun passà hajan ins anc quintà ch'ins possia segirar la via cun anguls, di il geolog Mauro Gschwend che survigilescha il grip. Il moviment saja dentant vegnì pli grond uschia che quai na saja betg pli pussaivel.
Manaschis purils pertutgads fermamain
Per ils set manaschis purils da Duvin munta quai, ch'il n'è betg pussaivel da cultivar sco usità lur surfatschas da l'intschess Saluzas, Clavau Dubel e Varduz cun ina surfatscha da tut en tut 33 ha surfatscha agricola durabla. Pertutgadas èn er las duas alps Radun e Selva. E quai ha consequenzas per ils manaschis purils. Tenor ils experts dal Plantahof saja fitg individual sco mintga singula puraria saja pertutgada. Sco proxim pass examinescha il Plantahof ensemen cun ils purs e las puras tge ch'els dovran sco sustegn. Ina buna nova datti dentant: ils pajaments directs per l'onn 2025 en en mintga cas segirads.
Via Varduz/Val da Sum Punt
-
Bild 1 von 6. Praid-crap Val da Sum Punts. Vista da la cuntraspunda tar Camuns. Bildquelle: vischnanca Ilanz/Glion.
-
Bild 2 von 6. Val da Sum Punt cun galaria . Gia il 1982 identifitgà sco punct critic. Bildquelle: vischnanca Ilanz/Glion.
-
Bild 3 von 6. Stan avrigl 2024. Bildquelle: vischnaca Ilanz/Glion.
-
Bild 4 von 6. Stan actual, avrigl 2025. Bildquelle: vischnanca Ilanz/Glion.
-
Bild 5 von 6. L'avrigl 2024 han ins constatà ina nova fessa en il grip – sin fundament da quai han ins decidì da survegliar il moviment. Bildquelle: vischnanca Ilanz/Glion.
-
Bild 6 von 6. Er sut la via è il grip en moviment. Bildquelle: vischnanca Ilanz/Glion .
Access permanent en il futur
La vischnanca haja gia fatg emprims pass per in'access d'urgenza ch'in pudess silmain passer a pe e cun la biestga. Tenor Marco Casanova duai quest access pudair vegnir realisà entaifer 4-5 emnas. Per in access permanent futur haja gia pli baud dà in project ch'haja gia sclerì en detagl sco ch'ins possia cuntanscher il territori da Varduz. Sin fundament da quest project hajan ins la speranza dad uss pudair spargnar temp – i saja realistic ch'il territori possia puspè esser accessibel cun in access sco il existent a partir dal 2028.