Sche Dario Hess discurra da barlot, alura patratga el d'ina vart vid lieus e ditgas: I dettia lieus en la Val Tujetsch cun nums sco «la platta dil barlot» ed il «lag dallas strias» e quai haja el vulì implementar in pauet. Ma da tschella vart è far barlot oravant tut far festa e laschar ora il portg. E lez fa la band cun chanzuns sco «Veta Biala» ni «Senza te». La Dario Hess Band integrescha en quels elements da musica celtica che po far sautar e suar la glieud en il public. Quell'influenza dal nord vegnia dal violinist Martin Gugger che haja adina giugà quella musica cun gust, ma era Dario Hess ha suenter ses viadis en l'Irlanda e la Scozia vulì duvrar quellas influenzas en sia musica, uschia il musicist cun ragischs tuatschinas e dimora en l'emprima citad sper il Rain.
Dapi ch'jau sun stà en Irlanda e Scozia ed udì quest sound, ha quai fatg insatge cun mai.
Anavos tar sias ragischs e sia giuventetgna va il musicist era cun in sound pli dir: La musica è uschia pli dira ch'els projects precedents, ils amplificaturs e «l'overdrive» da las ghitarras procuran per quella purziun dapli rock.
L'emprim ch'jau hai fatg era punk e metal e quai na dumogn jau betg ora.
Cun da la partida vid il bass è alura era Ursin Camenisch che ha gia sunà ghitarra en la gruppa da hardrock Satöry ensemen cun Dario Hess. Sper il bass dat Manuel Eicher cun ses gieu da battaria il fundament a quest album.
Chanzuns rumantschas ed ina excepziun
Dario Hess ha sunà en ils davos onns en differentas furmaziuns da musica. Ina giada fa el rock'n'roll u country cun liricas englesas. Tschella giada suna el cun ina Brass Band sursilvana in top pop rumantsch cun «Da da me cor». Per quest album ha Hess puspè scrit liricas rumantschas, cun excepziun da la ballada «Schifebruch» che Dario Hess chanta per tudestg svizzer.
Sin quest album èsi i a mai fitg fitg bun da scriver per rumantsch e quai è vegnì senza pli gronda grampfia.
En la chanzun «Camenisch Blues» raquinta Dario Hess in'istorgia che maina ses protagonist en il vair senn dal pled tras la merda en la libertad. Ins pudess discurrer d'in nov «storytelling» dal chantadur da rock.
Batten dal disc en la vallada da la glisch
L'album «Barlot» vegn battegià era sch'el fa in zic referenza a las flommas da l'enfiern, u forsa exact pervia da quai: La Dario Hess Band festivescha quest act ils 11 da matg 2024 a Cuschnaus en la Lumnezia. Ultra da quai sunan No Future e Petta Pagada, duas ulteriuras gruppas da rock sursilvanas, quella saira mintgamai in concert. Plinavant èn las novas chanzuns d'udir en direct giu dal palc al Indoor Festival a Mustér la proxima sonda. Ed i spetgan plirs auters festivals questa stad.
