Tenor emprimas enconuschientschas è il töffist da 49 onns viagià ensemen cun sia dunna da 53 onns en direcziun Flem. Il medem temp è ina manischunza da 31 onns charrada en tschella direcziun. Ella ha vulì ir a sanestra en direcziun industria, n'ha dentant betg vesì il töff, uschia ch'i ha dà ina collisiun frontala tranter l'auto ed il töff. Sinaquai è il töff lura anc collidà cun in auto ch'ha spetgà tar la cruschada.
Il töffist è anc mort al lieu. Sia dunna che seseva davostiers è vegnida transportada cun la Rega en l'ospital chantunal a Cuira cun blessuras mezgrevas. La manischunza levblessada è vegnida transportada en l'ospital regiunal. Ils trais passagiers da l'auto da la segunda collisiun n'han gì naginas blessuras.
En consequenza è la via da l'Alpsu stada serrada cumplettamain per in'ura. Suenter è il traffic vegnì manà sin in vial. Entras la serrada hai dà lungas colonnas en omaduas direcziuns. Ensemen cun la procura publica investighescha la polizia chantunala quest cas.