Las organisaziuns d'ambient na tiran betg vinavant la sentenzia da la Dretgira administrativa chantunala al Tribunal federal. Quai han ellas communitgà il glindesdi. Las organisaziun «Pro Natura Grischun», «WWF Grischun» e la «Fundaziun svizra per la protecziun da la cuntrada» èn però da l'avis ch'il project saja exagerà. En pli accentueschan las organisaziuns d'ambient ch'il project da coalliaziun na possia betg vegnir lubì sco project da meglieraziun, cunquai che l'agricultura n'haja betg interess cumprovà vid la via asfaltada, uschia èsi scrit vinavant. La procedura da meglieraziun per la via da colliaziun saja actualmain sistida.
Tschintg persunas privatas tiran il cas al Tribunal federal
Tuttina vegn il cas da la Via Migliè tractà al Tribunal federal: Tschintg partidas privatas han tratg vinavant il cas per impedir la via. Quai ha confermà il president communal Clau Schlosser envers RTR. Il fanadur aveva la Dretgira administrativa dà raschun a la vischnanca da Breil e refusà ils recurs da las tschintg partidas privatas e da pliras organisaziuns per la protecziun da l’ambient che vulan impedir questa colliaziun. La construcziun d'ina via tranter Breil e Vuorz/Andiast è ina part integrala dal contract da fusiun dal 2018.
«Cun gronda satisfacziun pudain nus communitgar che la voluntad e la decisiun dal pievel è vegnida respectada», scriva la suprastanza communala en sia communicaziun en il Fegl uffizial Surselva. Ella publitgescha la decisiun en connex cun la via da colliaziun Vuorz/Andiast-Breil. Ils recurs da las organisaziuns da l'ambient WWF e Pro Natura, sco era da tschintg privats, n'hajan betg gì success, uschia la suprastanza communala da Breil. «Igl è ina buna chaussa per tuts», remartga il president communal Clau Schlosser a la FMR.
Anc betg segir
Mez october da l'onn passà spetgava la suprastanza communala gia daditg sin la decisiun da la Dretgira administrativa dal Grischun. Lura aveva Clau Schlosser ditg a la FMR ch’ins speria che quella vegnia anc il 2023. Igl è ì pli ditg. Avant dus onns, il fanadur 2022, avevan las organisaziuns da l'ambient e las persunas privatas recurrì encunter la revisiun parziala da la planisaziun locala. Quella duai stgaffir la premissa da bajegiar ina via communala nova e cunquai colliar ils vischinadis Andiast e Vuorz cun il vitg da Breil.
Per la coesiun
La via da Migliè è in element essenzial per la coesiun da la vischnanca da Breil. «Per che quella possia crescher ensemen, per il scolaresser e per promover ils contacts e garantir ina stretga convivenza», uschia ils arguments plausibels dal contract da fusiun. Suenter l’emprima decisiun da fusiunar il 2012 avevan las autoritads prendì si la critica ed adattà la lingia da la via planisada. Il project actual na taglia betg pli il Migliè. La via duai manar cun ina punt dad 80 meters sur il Flem, da la vart dretga da quel orasum la via dal guaud da Tschuppina e vinavant en direcziun Plaun Rueun.