«Cun gronda satisfacziun pudain nus communitgar che la voluntad e la decisiun dal pievel è vegnida respectada», scriva la suprastanza communala en sia communicaziun en il Fegl uffizial Surselva. Ella publitgescha la decisiun en connex cun la via da colliaziun Vuorz/Andiast-Breil. Ils recurs da las organisaziuns da l'ambient WWF e Pro Natura, sco era da tschintg privats, n'hajan betg gì success, uschia la suprastanza communala da Breil. «Igl è ina buna chaussa per tuts», remartga il president communal Clau Schlosser a la FMR.
Anc betg segir
Mez october da l'onn passà spetgava la suprastanza communala gia daditg sin la decisiun da la Dretgira administrativa dal Grischun. Lura aveva Clau Schlosser ditg a la FMR ch’ins speria che quella vegnia anc il 2023. Igl è ì pli ditg. Avant dus onns, il fanadur 2022, avevan las organisaziuns da l'ambient e las persunas privatas recurrì encunter la revisiun parziala da la planisaziun locala. Quella duai stgaffir la premissa da bajegiar ina via communala nova e cunquai colliar ils vischinadis Andiast e Vuorz cun il vitg da Breil.
Sco quai che Clau Schlosser ha confermà a la FMR na possian las autoritads anc betg esser satisfatgas dal tut. «Avert è anc sch’ils pertutgads tiran vinavant la decisiun», renda el attent. Il president punctuescha dentant a la FMR: «Sco gia la regenza grischuna, ha era la dretgira dà raschun a nus e refusà, cun fitg buns arguments, tut ils puncts dal plant».
Per la coesiun
La via da Migliè è in element essenzial per la coesiun da la vischnanca da Breil. «Per che quella possia crescher ensemen, per il scolaresser e per promover ils contacts e garantir ina stretga convivenza», uschia ils arguments plausibels dal contract da fusiun. Suenter l’emprima decisiun da fusiunar il 2012 avevan las autoritads prendì si la critica ed adattà la lingia da la via planisada. Il project actual na taglia betg pli il Migliè. La via duai manar cun ina punt dad 80 meters sur il Flem, da la vart dretga da quel orasum la via dal guaud da Tschuppina e vinavant en direcziun Plaun Rueun. Las organisaziuns da l'ambient n'han anc betg vulì prender posiziun en connex cun quella decisiun da la Dretgira administrativa.
