L'ultim temp procuran chauns da protecziun per lingias grassas. A Flem han trais chauns da protecziun stgarpà in chaun da chasa sin il plaun da Bargis.
Betg pli blers conflicts ch'auters onns
L'onn 2021 hai dà set murdidas da chauns da protecziun ubain cunter umans u chauns da chasa. En cumparegliaziun cun las 325 murdidas da chauns da chasa è quai ina pitschna cumpart. Mess en relaziun cun il dumber total da chauns è la schanza da vegnir mors d’in chaun da protecziun per in terz pli grond che d’in auter chaun.
Chauns procuran per tema
Bleras persunas han snavurs cura ch’i vesan chauns da protecziun en acziun. Cura che dus da quels curran a giappond envers persunas, intgins interrumpan lur turas e turnan frustrads a chasa. Mordan chauns persunas u auters chauns ston ils medis u veterinaris che tractan la blessura far ina annunzia al chantun. Quel instradescha ina denunzia uffiziala e la polizia sto intercurir il cas.
Trais incidents quest onn
Uschia ha la polizia chantunala confermà a RTR ch’i ha dà l’entschatta matg a Sedrun in'attatga da dus chauns sin in chaun da chasa dil raz Pudel, l’entschatta fanadur hai dà a Mustér in inscunter tranter dus chauns da protecziun ed ina viandanta. Cun fugir dals chauns ch'eran siglids sur la saiv da nursas è la dunna reclada e sa blessada uschia ch'ella ha stuì laschar tractar dal medi. Il davos cas è capità a Flem nua che trais chauns da protecziun han sin lur viadi a chasa mazzà in Yorkshire Terrier. A Flem ed a Sedrun hai dà ina denunzia uffiziala.
Responsabladad n’è betg sclerida
Per vegnir a las infurmaziuns en cas da morsas da chauns na datti betg ina persuna u in uffizi responsabel che sa dar scleriment cumplessiv. Ils problems cun chauns da protecziun vegnan tractads da quatter uffizis en dus departaments dal chantun. Nagina persuna sa dar resposta a moda cumplessiva e bleras dumondas vegnan uschia stuschadas vi e nà. Quai è cunzunt per puras e purs stentus cura ch'els dovran sustegn suenter in incap cun chauns da protecziun.
