Avant set onns ha il cussegl da vischnanca da Mustér concedì in credit da 375'000 francs per elavurar in project per la renovaziun dal Center da sport e cultura. Quai è stà il culp da partenza per il project d’innovaziun dal Center Fontauna, sco el vegn numnà dapi il 2020. Las davosas emnas èn las lavurs idas a fin. Sonda, ils 24 d’avust 2024 ha la vischnanca da Mustér inaugurà l’infrastructura sanada, modernisada e cumplettada cun in act festiv.
Investiziuns da 10,6 milliuns francs
En il decurs dals davos set onns ha la vischnanca da Mustér investì 10,6 milliuns francs en il Center Fontauna. Persuenter ha ella obtegnì sustegn da pliras varts: 460'000 francs dal Program San Gottardo ed in milliun francs or dal fond d’infrastructura relevanta per il sistem dal chantun Grischun. Latiers vegn ina restituziun da 450'000 francs da la taglia sin la plivalur, uschia che la vischnanca sezza impunda 8,69 milliuns francs per il center. Sco quai ch’il president da la cumissiun dal Center Fontauna e cusseglier communal Clemens Berther ha ditg sin dumonda, è la finanziaziun dal project tant sco terminada: «Il 2024 vali anc da far in deposit da 90'000 francs e silsuenter è l’investiziun en il Center Fontauna liquidada. Il svilup finanzial dal project è fitg legraivel e bler meglier che planisà a l’entschatta dal project. Quest fatg è d’engraziar a la buna situaziun finanziala da la vischnanca da Mustér.» Ils davos onns haja la vischnanca pudì far successivamain remessas per il project dal center.
Prest dus onns da construcziun
L'avrigl 2022 han las lavurs da bajegiar en il Center Fontauna cumenzà. Quai ha lura era gì consequenzas per il manaschi che ha stuì s’organisar e s’adattar fin che las lavurs principalas en l'intern èn stadas terminadas la fin 2023. Stuì s’adattar ha era la clientella dal center. «Igl è stà ina gronda sfida per il manaschi durant quel temp. En quels radund dus onns da lavurs internas avain nus gì serrà il center sulettamain trais dis», di Clemens Berther. Grazia a la buna lavur dals planisaders, survegliaders e las interpresas, hajan tut ils termins fixads pudì vegnir resguardads.
Las duas novaziuns essenzialas dal Center Fontauna pertutgan l’entrada cun ina cafetaria e cuschina nova sco era las localitads novas en il plaunterren, nua ch’il lavuratori communal sa chattava pli baud. Duas ulteriuras stanzas – ina per gieus e l’autra per sedutas – èn vegnidas transferidas or da l'anteriur deposit dals pumpiers gist sper la cafetaria nova. L'anteriur lavuratori communal en il plaunterren ha survegnì auters intents. Tranter auter datti là ussa in nov e spazius center da fitness, ina localitad polivalenta sco era indrizs sanitars. Medemamain è la halla da raiver vegnida sanada ed amplifitgada cun il sectur da bouldrar. Vegnì renovà è er il palantschieu da la halla da tennis. En quella hai era dà ina nova illuminaziun. Sper la sanaziun dal conturn dal bajetg principal dal center è era vegnì construì in nov pump parc.
Tetg e fatschada cun fotovoltaica
En il rom da la projectaziun da la sanaziun e cumplettaziun dal Center Fontauna ha la vischnanca da Mustér era fatg ponderaziuns davart in indriz da fotovoltaica sin il tetg sco era vi da la fatschada dal sid. Quest implant è vegnì realisà da la Repower. L'implant producescha energia electrica en la dimensiun dal diever da radund 200 chasadas.
