Il «Calender per mintga gi» è ina publicaziun che vegn edida mintg’onn e quai gia dapi passa 100 onns. El tutga en bleras chasadas da la Sutselva e da la Surselva bassa. Dapi la fusiun da la Renania, cun la Romania tar la Surselva Romontscha il 2006, vegn il «Calender per mintga di» edì da la fundaziun cun il medem num. Ma la cumparsa è dapi l’entschatta la medema, uschia che mintgin vesa immediat da tge publicaziun che quai sa tracta. Dapi 25 onns maina Manfred Veraguth la redacziun per la part sursilvana. Ed el haja adina fatg quai gugent e cun plaschair, di l’um ch’abitescha cun sia famiglia a Sagogn. Pir uss suenter la publicaziun saja el vegnì pertschert che quai saja propi stà sia ultima. Tge che vegnia a mancar, gliez vegnia pir a sa mussar. Pertge redactur d’in chalender èn ins l’entir onn e cunquai ch’el haja uss fatg quai 25 onns vegnia segir ad esser spezial da betg pli s'occupar da tematicas e rubricas d’emplenir, uschia Manfred Veraguth.
L’entschatta anc cun maschina da scriver
L’emprim chalender haja el anc scrit cun la maschina da scriver e tge che saja restà tut quels onns, el survegnia anc adina brevs cun en texts scrits a maun, ch’el haja alura da scriver cun computer, di Manfred Veraguth. Dapi lura sajan bleras chaussas vegnidas pli simplas. Uschia possia el uss anc esser flexibel la stad e far tschertas midadas, quai che n’eri a l’entschatta betg pussaivel. Cura ch'el haja cumenzà stueva il chalender esser pront la primavaira, per surdar ils temas a las differentas auturas ed auturs ed ord differents motivs eri alura il chalender sin maisa tut in auter che quel planisà la primavaira. Plinavant sa midà saja ch’el n'haja betg pli da tschertgar auturas ed auturs, quels vegnian cun lur propstas e quai saja fitg bel da surdar a ses successur in product che funcziuni, di Manfred Veraguth.
Successiun è vegnida organisada da la fundaziun
La fundaziun «Calender per mintga gi» ha elegì e tschertgà la successiun da Manfred Veraguth e chattà quella en la persuna da Martin Gabriel, redactur da la FMR ed anteriur secretari general da la Lia Rumantscha. Gabriel vegn introducì successivamain durant ils proxims onns.
El saja led che quai dettia ina successiun, di Manfred Veraguth. Surtut giavischia el che las lecturas ed ils lecturs stettian fidaivels e che giuvnas e giuvens scrivents possian far en questa furma lur emprimas experientschas cun publitgar text e quai per ils proxims 100 onns.
