L’um da fatschenta e sia dunna èn entras lur firma possessurs da l’ustaria Burleun en il territori da skis a Breil. Per la destinaziun turistica da Breil e sia economia èn ils indrizs da las pendicularas fitg impurtants e l’ustaria tar la staziun da mez è vitala per il manaschi turistic, surtut l’enviern. Las pendicularas han vendì il bajetg en il dretg da construcziun a la firma dal sentenzià l’onn 2017. E lezza ha alura renovà l’ustaria per passa dus milliuns francs. Uss è il bajetg vegnì confiscà da la dretgira tenor la sentenzia da questa stad.
Pajar enavos ils donns chaschunads
L’um da fatschenta ha tenor la sentenzia cugliunà per ina summa da delict da radund 6,9 milliuns francs. La dretgira ha confiscà las facultads dal sentenzià er era da sia dunna.
En principi pudessan ils donnegiads dumandar ch'els survegnian immediat daners or da questa facultad confiscada, tge ch'avess consequenzas gravantas per il pèr. Mo ins saja sa cunvegnì da far quai auter, ha l’advocat da las partidas donnegiadas Jürg Wernli ditg ad RTR. La finamira saja ussa suenter la sentenzia ch’ins possia en ina segunda fasa trair a niz la facultad confiscada, pia converter quella en daners. Quai cun l’agid dals possessurs e d’in fiduziari che surveglia quest process per las partidas donnegiadas. Lezzas èn 28 cuminanzas da lavur, uschenumnadas ARGE, e pliras firmas da construcziun e d’immobiglias. L’intent da la cunvegna saja ch'ins possia cuvrir uschè bain sco pussaivel ils donns chaschunads. Il sentenzià haja uss in tschert temp da pajar enavos ils donns.
Mintga vendita da facultad confiscada sut squitsch ha il ristg ch’il gudogn n’è betg uschè bun. Uschia han ins sapientivamain vulì minimar quest ristg.
Quant temp ch'ins dettia al sentenzià da pajar, na di l’advocat dals donnegiads betg, quai pervia da raschuns da speculaziun d’immobiglias. Il sentenzià e sia dunna da lur vart n'han betg vulì prender posiziun en chaussa. Lur advocat Lucius Richard Blattner ha dentant scrit ad RTR, ch’ins haja chattà ina fitg buna schliaziun per tuts. Perquai n'haja er nagina partida contestà la sentenzia.
La schliaziun pussibilitescha in manaschi senza disturbi da l’ustaria che n’è betg periclitada en sia existenza.
Er l'advocat dals donnegiads Jürg Wernli discurra d'ina schliaziun cuntentaivla.
Persunas bainvesidas a Breil
Il pèr è bain enconuschent a Breil. Els han cumprà davent da l’onn 2015 pliras immobiglias là. Oriunds èn els da Meiringen en la Part Sura Bernaisa, e là han els ina fatschenta d’immobiglias. 2017 han els fundà ina filiala da lur fatschenta d’immobiglias a Breil. Il pèr è vegnì en la publicitad sco ils investiders che han cumprà e renovà l'ustaria Burleun avant set onns. Cun questa investiziun da passa dus milliuns francs han els fatg blers amis, insumma è il pèr bernais vegnì retschavì cun bratscha averta, sco pliras funtaunas han confermà.
In mussament per las colliaziuns socialas ed economicas: L’um è vegnì elegì sco commember dal cussegl administrativ da las pendicularas en l’onn 2018. Per l'auter è el er daventà commember dal cussegl administrativ dal club da golf da Breil. Entaifer in pèr paucs onns è il pèr s'etablì cun sias fatschentas a Breil. La sentenzia da la Dretgira bernaisa ed er l’inquisiziun penala ch’è precedida hajan dentant fatg donn a la reputaziun, uschia nossas funtaunas.
Co pajar enavos daners tar ina sentenzia d'arrest?
Tenor las autoritads bernaisas na sto in sentenzià betg ir exnum en ina praschun per expiar sia sentenzia. El po dumandar, sut tschertas premissas, ch'el po per exempel seser giu il temp cun ina surveglianza electronica, pia cun in bratschlet che survigilescha ils moviments dal sentenzià. Sch'il possessur dal Burleun ha uschè ina surveglianza, na han las autoritads bernaisas betg pudì tradir, ma tenor pliras funtaunas è il sentenzià vinavant da chasa a Breil e lavura en la regiun. El ha uschia la pussaivladad da s'occupar da ses duairs, tge che munta: pajar enavos ils donns ch'el ha chaschunà.
