Brass Band da giuvenils - Uss vegn puspè fatg musica a Sursaissa

Dapi passa 30 onns è la segunda emna da fanadur il temp nua che las giuvnas musicantas ed ils musicants vegnan a Sursaissa per sunar musica da brass. Ils ultim onns è il dumber da participantas e participants sa reducì sin radund 40 persunas. Uschia ch’ils responsabels pon furmar ina buna band, ma betg pli ina A ed ina B band, declera il president da la Gruppa d’interess Brass Band da giuvenils grischuna, Toni Deplazes.

Ma l’interess è anc adina avant maun, simplamain in zic pli pitschen ch’anc ils onns cura che Toni Deplazes ha sunà en las retschas activas e la participaziun era tar sur 100 musicantas e musicants e tuts stuevan far in examen per insumma pudair sunar. Ma la qualitad è era quest onn fitg buna e las musicantas ed ils musicants èn preparads fitg bain, uschia Toni Deplazes.

Sch’il dumber croda sut 30 lura vegni problematic

Il mument possian els anc occupar mintga sutga cun ina vusch. Era sche quai vegniss ina giada sulet 30 musicantas e musicants fissi pussaivel da sunar. Ma cura ch’ins na vegnia betg pli dad occupar tuttas vuschs alura stoppian ins far ponderaziuns. Quai na saja il mument anc betg il cas, uschia Toni Deplazes. La raschun principala per la digren èn las annadas flaivlas da naschientschas e la finala era il fatg che pli paucs giuvenils fan musica mabain sport, uschia il tenor da pliras participantas e participants. Era na saja quai betg pli propi normal d’unfrir in'emna vacanzas per il hobi, ma forsa sa mida quai anc. La speranza veglian els dar si sco pli davos, uschia Toni Deplazes.