Dasper il dar scola èsi era puspè da porscher a las scolaras ed ils scolars il transport en scola e per quels che vulan era la maisa da mezdi. Uschia era en la scola da la vischnanca da Lumnezia. Per il transport da las scolaras ed ils scolars cun ils meds publics saja da ponderar co far, di il mainascola Conradin Caduff. Ma en tutta cas na vegnian ils scolars betg a purtar mascras da protecziun, da quai scusseglia era la Confederaziun.
Ma co far vegnian era ils proxims dis a mussar. Per ils uffants che vegnian en in bus da scola na saja quai betg in problem, lez sajan tranter els ed en general era il temp liber ensemen, uschia ch’il contact cun autras persunas saja quasi nulla.
Gentar en scola
Il «Da casa Val Lumnezia» cuschina vinavant ils gentars per las scolaras ed ils scolaras. Ma ils scolars na van betg sco usità en la chasa d’attempads, mabain il gentar vegn furnì. Sumegliant vegn quai era fatg a Mustér, nua che las tschaveras vegnivan mangiadas avant il coronavirus en il «center da sanadad Puntreis». Uss vegn quel furnì en chasa da scola quai che na saja betg in problem, di Diego Deplazes manader dal center da sanadad. Els hajan gia experientscha cun furnir gentars a la canorta d’uffants pitschens e la soluziun actuala na saja betg in problem per els.
