Per Batist Spinatsch, cussegliader al Plantahof a Landquart, è la stad d’alp stada ina buna stad. Cunquai ch’i ha pluvì savens – n'è la situaziun cun aua betg stada in tema ed era il pavel è creschì bain. Il chaschiel d’alp saja per gronda part bun. Dentant manchia segir la quantitad, perquei ch'ils gronds quantums latg vegnian mulschids al cumenzament da la stad. Ina correlaziun tranter quantitad e qualitad na dettia quai betg, accentuescha Batist Spinatsch.
Il luf e las nursas
Surtut las alps da nursas hajan gì da sbatter cun il luf. Uschia sajan pliras alps da nursas vegnidas stgargiadas pli baud, e quai en l’entir chantun. Ina da quellas è stada l’alp Cristallina en la Val Medel. Qua han ils purs stgargià radund trais emnas pli baud las nursas. Sco il president da la cuminanza d'interess Alp Cristallina Armin Manetsch di, sajan segir quatter nursas vegnidas mazzadas dal luf. Dentant plirs animals èn anc sparids ed sch’ins na chattia betg immediat els na possian ins alura betg dir sch’els èn propi stgarpads dal luf, accentuescha Manetsch.
Per els saja surtut la gronda lavur supplementara stada la raschun da stgargiar pli baud. Dasper il manaschi a chasa saja anc blera lavur da far sin l’alp, e quai saja era in grond squitsch emoziunal. Dasper quai vegni era la sperdita da radund 20'000 francs per l’alp, ed ils daners supplementars per pavlar ils animals a chasa per mintga pur. Quai saja lura svelt summas da plirs milli francs, di Armin Manetsch. Tenor el saja quai pir il cumenzament, e pliras alps vegnian en futur a stuair far ponderaziuns co cuntinuar.