Alexandra Flepp - «Mussar che quai va era auter»

Fundar ina stizun era in siemi d’Alexandra Flepp. Ma propi il stausch è vegnì cura ch’ella ha realisà che la branscha da textilias è responsabla per bler rument da plastic e per relaziuns da lavur e producziun discutabla. Perquai ha ella ponderà da fundar sia atgna fatschenta da vestgadira certifitgada e persistenta e quai cun 25 onns.

Curaschi dovri, ma betg sulet

L’idea da promover products persistents saja impurtanta per ella, perquai porschia ella tut senza plastic en sia stizun. Ils products da cosmetica u era da lavar resti sajan pachetads en chartun e tut ils products sajan senza chemicalias nuschaivlas, di Alexandra Flepp. L’emprim haja ella dentant stuì elavurar in plan da fatschenta per insumma avair ina survista. Uschia haja ella analisà il potenzial e constatà che quel saja avant maun. Senza sustegn da la famiglia e da ses entir conturn na fiss ina tala aventura cun in'atgna stizun betg stada pussaivla, di Alexandra Flepp.

Fin uss in bun resun

Ils emprims dus mais che la stizun «Essenza» è uss averta sajan surtut indigens vegnids. Quai saja fitg legraivel, pertge ella na veglia betg midar il mund, ma mussar ch'i dettia era autras vias da cumprar products, e quai senza desister da confort u auter, di Alexandra Flepp. E per ella saja impurtant ch’ella possia raquintar a la clientella da ses products, co quels vegnian fatgs e da tgi e la gronda part apprezieschia fitg quai. Perquai sa legra la dunna giuvna uss era sin la stagiun d’enviern, nua ch'i vegn a sa mussar sch’ils products chattan era sustegn da turistas e turists.