Ils spazzachamins Taisch han tradiziun en l'Engiadina Bassa. Gia la terza generaziun da la famiglia lavura uss sco spazzachamin. Cumenzà ha Jon Taisch cun la fatschenta, lura han ses figls Hermann ed Albert Taisch cuntiunà ed avant in onn ha il figl da Hermann surpiglià per el sco spazzachamin. Quai suenter che Hermann Taisch ha fatg la lavur da spazzachamin en l'Engiadina Bassa passa 40 onns.
Marco Taisch aveva fatg l'emprenissadi sco spazzachamin, ma ha lura vulì midar clamada e gist fatg in segund emprendissadi sco tschentapignas. Suenter avair lavurà varga 40 onns sin quest mastergn, è el dentant sa decidì da supigliar da ses bab. Il 2016 suenter che Marco Taisch ha decidì da surpigliar da ses bab ha el stuì far la scolaziun sco maister spazzachamin. Quai ha muntà per el da puspè ir a scola cun conscolars ch'eran per part be mez uschè vegls sco el sez. Durant la scolaziun ha el lavurà sco spazzachamin en l'Engiadina Ota, durant ils dis da scola aveva el liber, ma quai muntava era ch'el aveva en quest temp damain paja. Sia famiglia ha sustegnì el per la scolaziun ed el ha pudì surpigliar l'onn passà la fatschenta.
