Alexi Decurtins è probablamain enconuschent a tut las persunas ch’han gì da scriver in text per sursilvan. Pertge ses dicziunaris vegnan duvrads savens u en furma tradiziunala sco cudesch, ma era en sia versiun online. Ma las lavurs e l’engaschi dad Alexi Decurtins eran uschè multifars ch'Arnold Spescha numna el in decatlonist. El saja s’interessà dad uschè blers temas ed el haja dà uschè blers cussegls ch’el saja propi stà ina persuna cun interess multifars, betg sulet interess linguistics, declera Arnold Spescha, ch’è stà responsabel per il cudesch festiv edì da la Canorta Fontaniva.
Cumplenir 100 onns – in regal
Sco Arnold Spescha ha ditg en ses pled festiv en la sala da cultura a Trun, saja gia cuntanscher la vegliadetgna da 100 onns in regal. Ma quai saja er il merit dal giubilar, ch’haja vivì ina vita intensiva e lavurà la testa giud la persuna, ma el haja er adina pudì far ina pausa da detensiun e recreaziun e quai saja art, art da viver, uschia Arnold Spescha. Cun quasi 90 onns ha Alexi Decurtins pudì edir ses cudesch che vala sco sia ierta professiunala. Il «Lexicon Romontsch Cumparativ» in cudesch d’in pais da quasi trais kilos e da passa 1'400 paginas. Tut ils cudeschs d’Alexi Decurtins saja stads voluminus, uschia Arnold Spescha. E perquai saja el la conscienza linguistica rumantscha.
Cudesch festiv en trais parts
Il cudesch festiv ha trais parts. En las emprimas parts datti in pled sin via da Theo Haas, il parsura da la Canorta Fontaniva ed in'undrientscha dad Arnold Spescha. La segunda part dal cudesch èn texts scrits d'Alexi Decurtins. Quels van da General Demont, sur Alois Carigiet enfin tar la part nua che vocabularis pratics, grammaticas e lur auturs vegnan tematisads. La terza part dal cudesch per Alexi Decurtins furman omagis al linguist premurà. In da quels omagis vegn da Iso Camartin ed el numna il giubilar «Il ballerin intellectual romontsch».
La famiglia ha laschà publitgar bleras fotografias
Ina autra impurtanta part dal cudesch festiv furman las fotografias che la famiglia ha mess a disposiziun. Uschia datti passa 80 fotografias dal passà ed actualas. Sco Arnold Spescha ha ditg en il pled da natalizi duajan las fotografias furmar in accord festiv en ina sinfonia da respect e legria. Alexi Decurtins po festivar ils 20 da november 2023 ses anniversari da 100 onns.