Alexi Decurtins e Gion Tscharner èn linguists e redacturs da dicziunaris e vocabularis en lur idioms. Omadus hajan prestà enorm bler per la lingua e la cultura rumantscha, scriva la SRG.R en sia communicaziun.
Lavur per il rumantsch per blers onns
Alexi Decurtins ha edì vocabularis sursilvans, tranter auter il «Niev vocabulari romontsch sursilvan-tudestg» dal 2001, che vegn er consultà ozendi en la versiun regiunala. En pli è il linguist da Trun, che accumplescha quest onn 100 onns, er stà chauredactur dal DRG dal 1975 fin il 1988. Suenter sia pensiun ha el lavurà sco voluntari per la lingua e stà responsabel per il «Lexicon Romontsch Cumparativ». Per sia perseveranza e lavur sur blers onns vul la SRG.R undrar el.
Vocabularis puters e valladers
Gion Tscharner è stà plevon e magister da rumantsch ed è enconuschent en Engiadina sco iniziant dals novs dicziunaris vallader e puter. Avant e suenter sia pensiun ha Tscharner rimnà var 83’000 pleds da l’idiom puter e 96’000 dal vallader.
Tscharner viva a Zernez, ma ha ragischs en la Tumleastga. El ha cun quai er deditgà ina da sias lavurs al rumantsch da Sched. Il 2017 ha el publitgà il cudesch «Sched a seu lungetg» davart l’istorgia da la lingua da Sched.
Il premi SRG.R 2023 vegn surdà ils 10 da zercladur 2023 a chaschun da la radunanza generala da la SRG.R a Vella ed è dotà cun 8'000 francs.
Or da l'archiv
