Ils delegads e las delegadas da la PLD han stuì nominar ina persuna che duai candidar per in sez en la regenza e betg per dus candidats, quai sin dumonda da la direcziun da partida. Martin Bühler è sa mess tras cunter la suletta dunna Vera Stiffler ed ils dus politichers cun experientscha Urs Marti e Maurizio Michael.
En il segund scruttini ha lura l'actual schef dal stab directiv Martin Bühler fatg dapli vuschs che Urs Marti, numnadamain 73 vuschs da tut en tut 137. La presidenta da la fracziun e deputada dal Cussegl grond Vera Stiffler ed il vicepresident da la PLD Maurizio Michael èn gia crudads or en l'emprim scrutini.
La concurrenza da Bühler
-
Bild 1 von 3Legenda: Urs Marti Sco president da la citad da Cuira ha Urs Marti experientscha en la politica. En trais onns sto el dar giu quest uffizi pervi da temp da limitaziun. RTR -
Bild 2 von 3Legenda: Vera Stiffler La suletta dunna ch'è stada a disposiziun. Ella è la presidenta da la fracziun da la PLD en il Cussegl grond e creschida si a Cuira. RTR
-
Bild 3 von 3Legenda: Maurizio Michael Vicepresident da la PLD oriund da la Bregaglia. RTR
Surpraisa per blers – er per Bühler sez
Che Martin Bühler ha insumma cuntanschì il segund scruttini ha franc fatg surstar ina u l'auter. Er Martin Bühler saja stà surstà ch'i haja tanschì. Uschia ha el ditg envers RTR ch'i haja dà temps en quels ch'el haja cartì ch'i gartegia, ma er temps nua ch'el n'haja betg cartì ch'i tanschia.
Jau sun intgantà – er perquai ch'jau hai sentì d'avair il sustegn. Sco i para da bleras e blers, quai repartì en l'entir chantun.
Uss cumenzia in temp intensiv. Far cumbat electoral saja insatge nov per el, di il manader dal stab directiv ch'è pli disà da manevrar durant temps cun bovas e pandemias.
Hug per la PPS – Peyer per la PS
La PPS veva gia annunzià il settember ch'ins giaja en la cursa cun Roman Hug . Cun ses president vul la partida populara dumagnar quai che n'è betg reussì las ultimas duas giadas cun Walter Schlegel e Heinz Brand.
La direcziun dals socialdemocrats veva proponì il zercladur da danovamain ir en il cumbat electoral cun Peter Peyer . Il minister da sanadad haja pudì persvader durant si'emprima legislatura. La nominaziun uffiziala da Peyer duai succeder il di da la partida ch'è il november.
Allianza dal center vul nominar il november u december
L'Allianza dal center ch'occuppescha il mument trais sezs en la regenza, n'ha anc betg annunzià sia strategia. A la radunanza da delegads veva il co-president Kevin Brunold ditg ch'ins vegnia a nominar las candidaturas per la regenza il november u il december.
Ils dus cussegliers guvernativs Marcus Caduff e Jon Domenic Parolini sa mettan puspè a disposiziun per in'ulteriura perioda d’uffizi. Mario Cavigelli chala suenter 12 onns en la regenza.