Museum Kirchner
Tavau: Bajetg annex per il museum Kirchner
-
GEA
1'363 Vuschs
-
NA
1'707 Vuschs
Il project d'engrondir il museum dal renumà artist tudestg Ernst Ludwig Kirchner a Tavau ha survegnì in canaster dal suveran. Bunamain 56% da las votantas e dals votants han refusà il credit da quatter milliuns francs ed ina garanzia da deficit da maximalmalmain quatter milliuns francs. La participaziun è stada tar 48%.
Sconfitta per il svilup cultural en la regiun
Suenter la votaziun scriva la direcziun dal museum che la decisiun dal suveran saja ina schanza manchentada. Concret muntia quai che il project da la collecziun Ulmberg na possia betg vegnir realisà. Quai saja ina sconfitta per il svilup cultural en la regiun. L'idea era d'extender il Museum Kirchner cun in edifizi annex, quel era previs sco lieu d'exponer la collecziun Ulmberg. Quai è ina collecziun privata ch'il museum leva prender si ed exponer.
Nus respectain ma deplorain la decisiun. Nus vulevan stgaffir ina plivalur per il futur, per en 10 enfin 20 onns.
Memia blers daners
La suletta partida ch'è stada encunter l'engrondiment dal Musuem Kirchner è la Partida populara. Il co-president da la PPS da Tavau Andreas Palmy ha prendì posiziun suenter la votaziun tar ils collegas dal schurnal regiunal da SRF. El di ch'il resultat mussa che la populaziun haja realisà ch'il credit avess muntà da dar or blers daners da taglia per ina collecziun privata e per ina fundaziun che na paja betg taglia a Tavau.
Nus avain nagut cunter il Museum Kirchner – ma i n'è betg uschia che la gronda massa viseta quest museum, l'investiziun fiss stada memia gronda.
Ils custs da construcziun dad en tut 11,5 milliuns francs eran previs da finanziar cun sponsurs privats, dal Forum d'economia Tavau e l'investiziun da la vischnanca che la populaziun ha refusà.
Avant che la fatschenta è vegnida a l'urna aveva il Grosser Landrat acceptà il project cun gronda maioritad. Igl aveva sulettamain dà ina cuntervusch.
