Las lavurs da la fundaziun medias rumantschas pon cumenzar. Cun serrar giu il quint a la radunanza da delegads da la Lia Rumantscha è il project FMR vegnì surdà formalmain en ils mauns da la nova presidenta da la fundaziun, Corina Casanova, e l'emprim schefredactur, David Truttmann.
Martin Gabriel ha surdà ses project
La gruppa da lavur che ha elavurà il project FMR è stà sut la batgetta dal secretari general da la Lia Rumantscha, Martin Gabriel. Dapi la stad 2017 è s'occupada la gruppa da lavur cun la Fundaziun medias rumantschas. Il project FMR ha custà al chantun Grischun ed a la Lia Rumantscha 650'000 francs.
Jau sun fitg levgià. I va en ina fitg buna direcziun. Nus avain cuntanschì quai che nus vulevan. Uss hai jau il sentiment che nus dastgain surdar in project cun in resultat che constat cumplettamain.
RR actualitad 07:00
