Tar l'Uffizi da chatscha e pestga dal chantun Grischun na pon il mument duas persunas che lavuran en posiziuns pli autas betg lavurar. Omaduas pateschan da burnout. Er il manader da l'uffizi era gia crudà ora per pli lung temp per raschuns da sanadad. Per far frunt a la surchargia ha il chantun prendì emprimas mesiras.
Dapli resursas
L'Uffizi da chatscha e pestga vul prender sut la marella la situaziun da lavur dal persunal. Cun ina retschertga tar il persunal vul l'uffizi chapir meglier nua ch'il chalzer smatga propi, e nua ch'i dess pussaivladads d'optimar. Quai ha la cussegliera guvernativa responsabla Carmelia Maissen ditg envers il schurnal regiunal da SRF. Dapi ch'il manader da l'uffizi era crudà ora per raschuns da sanadad haja l'uffizi era gia prendì emprimas mesiras.
Nus avain pudì metter a disposiziun dapli ressursas.
Cunzunt tar temas sco il management dals lufs, nua ch'i dettia blera lavur supplementara, hajan ins pudì augmentar il persunal. Dentant er en auters champs hajan ins pudì metter a disposiziun resursas. Uschia dettia uss tschintg plazzas da guardiaselvaschina dapli. Ed a la testa da l'uffizi datti uss era ina co-direcziun.
Dentant n'haja la regenza grischuna betg uschè bler spazi d'agir cunquai ch'ils meds finanzials vegnan fixads dal Cussegl grond. Uschia ch'ins possia «be gist là stizzar il fieu nua che la miseria è la pli gronda», ha ditg Carmelia Maissen.
Nus constatain en l'entira administraziun chantunala in augment da persunas che crodan ora pervia da malsognas.
Betg be tar l'Uffizi da chatscha e pestga dettia dapli persunas che crodan ora, mabain en l'entira administraziun chantunala. Quai saja dentant probabel in fenomen da l'entira societad d'ozendi, agiunta Carmelia Maissen sa referind sin ils barats tranter la regenza e las differentas associaziuns en l'economia.
La dumonda da resursas saja adina puspè in grond tema en il parlament chantunal. La regenza fetschia adina puspè attent che «sch'ins vul dapli servetschs, offertas u ina pli auta qualitad da l'administraziun chantunala, lura dovri era las resursas necessarias persuenter».